Kujalleq qulimiguulimmut H155-imut hangareqaqqusisoq
Kommuni Kujallermi upalungaarsimasut qulimiguullip nutaap H115-ip Narsarsuarmi inissisimatinneqarniarnera ernumassutiginerarpaat. Timmisartortartut HOIST-imillu ingerlatsisut Qaqortumi najugaqarput. Upalungaarsimasut isumaqarput, annaassiniarnermi tamanna kinguaattoortitsisinnaasoq. Air Greenlandimit taamatut oqartoqarnera illuatungilerneqarpoq.
Qulimiguullit mikisut qulimiguulimmik nutaamik H155-imik 2022-mi aasakkut taarserneqassapput. Air Greenlandi qulimiguulinnik nutaanik arfinilinnik pisiaqarsimavoq, taakku bell-212-imit sukkanerusumik timmisinnaapput.
Air Greenlandimit pilersaarutigineqanngilaq, Qaqortumi qulimiguulinnut hangariliornissaq, tamanna Kommuni Kujallermi upalungaarsimasunit ernummatigineqarpoq.
- Upalungaarsimasunut siulittaasutut soruunami soqutigisaraara, annaassiniarnerit kiisalu nunaqarfinniit illoqarfinniillu Qaqortumut assartuisarnerit isumannaannerpaamik piffissamilu sivikinnerpaami ingerlanneqartarnissaat. Neriuutigaara Air Greenlandimit aalajangiisartunillu allanit tamanna eqqarsaatigineqarumaartoq, Kommuni Kujallermi borgmesteri upalungaarsimasunullu siulittaasoq Stine Egede oqarpoq.
Qaqortumi timmisartoqarfik pingaaruteqarluinnartoq
Air Greenlandip Qaqortumi hangariliortoqannginnissaanik aalajangersimaneranut pissutaavoq, timmisartoqarfiliornissap suli qulakkeerlugu aalajangiunneqarsimannginnera. Timmisartoqarfiliortoqassappat, ingerlatseqatigiiffik hangarimut atorneqartussaanngitsumut aningaasanik amerlanerusunik atuisussaavoq.
- Ilumoorpoq, qulimiguullip H155-ip Narsarsuarmi inissisimasarnissaa taamalu hangareqarnissaa tunngaviusumik pilersaarutaammat. Qaqortumi hangariliornissamut unammillernartoqarnera arlalitsigut pissuteqarpoq, Air Greenlandimi pisortaaneq Jakob Nitter Sørensen oqarpoq, nangillunilu:
- Siullertut tamatumunnga pissutaavoq, Qaqortumi timmisartoqarfiliorniarnermut inaarutaasumik pilersaarutinik suli ilisimasaqannginnerput. Tamatuma saniatigut kiffartuussinissamik maanna isumaqatigiissutaasut 2024-mi atorunnaassapput, taakkulu pillugit isumaqatiginninniarnerit qanoq inerneqarumaarnersut ilisimanngilagut. Taamatut oqareerlunga oqaatigissavara, ilaatigut Mittarfeqarfinnik Issittumilu Sakkutooqarfimmik suleqateqarsinnaanermik periarfissanik suli misissuigatta, pisortaaneq oqarpoq.
Timmisartortartut HOIST-imilu ingerlatsisut Qaqortumi najugaqarnerat Kujallermi ernumassutigineqarpoq. Upalungaarsimasunit annaassiniarnermi kinguaattoortoqarsinnaanera ernummatigineqarpoq. Timmisartuutileqatigiiffimmilli isumaqarput, tamatuma annaassiniartarnerit sunniuteqarfigissanngikkai.
- Ilumoorpoq Air Greenlandimi sulisut ilaasa illoqarfimmi nunaqarfimmiluunniit suliffigisaminni najugaqannginnerat. Taakkuli sulinerminni suliaqarfiusumiittarput, taamaammat upalungaarsimanermut tamanna sunniuteqassanngilaq, Air Greenlandimit Sermitsiaq.AG-mut nassuiaatigineqarpoq.