Kuannersuit: VVM-imut missingersuut piumasaqaatinut anngutinngitsoq
Greenland Minerals Limitedimit atortussat VVM-imullu missingersuut aatsitassanut inatsimmi piumasaqaatinut Naalakkersuisullu najoqqutassiaannut naapertuutinngilaq. Taamak Aatsitassanut suliassaqarfimmut Avatangiisinut Aqutsisoqarfik nalunaarpoq. Nalunaarutaavoq ilaatigut avatangiisit pillugit suliniaqatigiiffimmit NOAH-mit nuanneerutigineqartoq.
VVM-imut nalunaarusiamik naammassisimasoqanngilaq, missingersuutilli pingasut naammassineqanngitsut tuluttut allassimasut. Maannakkullu missingersuut oqaatsinik imarisassaannullu piumasaqaatinik naammassinninngilaq. Aatsitassanut suliassaqarfimmut Avatangiisinut Aqutsisoqarfik Sermitsiamut taama ersaritsigisumik akissuteqarpoq.
Sermitsiaq allappoq.
- Suli erseqqissassallugu pingaaruteqarpoq VVM-imut nalunaarusiaq naammassisimanngimmat. Aatsitassanut suliassaqarfimmut Avatangiisinut Aqutsisoqarfik maannamut missingersuutinik pingasunik naammassisimanngitsunik tigusaqarsimavoq taamaallaallu tuluttut. VVM-imut nalunaarusiaq naammassisimasoq VVM-imut piumasaqaatinik naapertutissaaq, pisortatigoortumik tusarniaassutiginissaa pisortanit akuerineqartinnagu, aqutsisioqarfimmi pisortaq Najaaraq Demant-Poort Sermitsiamut akissummini allappoq.
Taassuma erseqqissarpaa Aatsitassanut suliassaqarfimmut Avatangiisinut Aqutsisoqarfik tassaanngimmat VVM-imut nalunaarusiamik akuersisussaq tusarniaasoqareerneratali kingorna Naalakkersuisut tamakkiisut taamaaliortussaallutik.
Allaaserineqartoq aviisimi Sermitsiami, aqagu tallimanngornermi saqqummersussami, tamakkiisumik atuarneqarsinnaavoq. Aviisi uani pisiarineqarsinnaalereerpoq: