Kuannersuit: Tusaniaalluni ataatsimiititsinissat ullulerneqartut
Greenland Mineralsimit, ilisimasalinni arlaannaannulluunniit attuumassuteqanngitsunit Naalakkersuisunillu pingasunit peqataatitaqartumik pilersaarutaasutut Kujataani Kuannersuarni aatsitassarsiorniarneq oqallisaaqisoq pillugu tusarniaalluni ataatsimiititsinissat aggustip 23-aniit 28-anut ingerlanneqassapput.
Kujataani innuttaasut Kuannersuarni aatsitassarsiorniarnermut atatillugu apeqquteqaqqinnissamut periarfissaqaqqilerput, tamatumuuna naalakkersuinikkut akisussaasumut apriilip qaammataani sioorasaarisoqarsimanera pissutigalugu tusarniaalluni ataatsimiititsinermut peqataasimanngitsumut toqqaannartumik apeqquteqartoqarsinnaalluni.
Ataatsimiititsinerni najuutissapput Ineqarnermut, Attaveqatigiinermut, Aatsitassanut, Inatsisit Atuutsitsinneqarnerannut Naligiisitaanermullu Naalakkersuisoq, Naaja H. Nathanielsen, Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund aamma Peqqinnissamut Naalakkersuisoq, Kirsten L. Fencker, ataatsimiititsinerit teknikkikkut ajornanngippat toqqaannartumik allakaatinneqassapput.
Naaja H. Nathanielsenip siusinnerusukkut oqaatiginikuuaa, tusarniaalluni ataatsimiisitsinernut politikkikkut peqataasoqarnissaa ”pingaaruteqarluinnartoq”, politikkikkullu amerlanerussuteqartut Kalaallit Nunaanni aatsitassanik qinngornernik ulorianartortalinnik piiaasoqannginnissaanik kissaateqaraluarpataluunniit, inatsit malillugu tusarniaalluni ataatsimiisitsinerit ingerlanneqartussaasut.
Periarfissaq kingulleq
Innuttaasut politikkikkut akisussaasumut toqqaannaq apeqquteqarnissaannut tamanna kingullertut periarfissaavoq. Tusarniaanermut akissuteqaammik tunniussinissamut septembarip 13-iat killiliunneqarsimavoq, upernaaq qinersisoqarneranut atatillugu akissuteqaammik tunniussinissamut killiliussaq arlaleriarluni kinguartinneqartarsimavoq.
Aatsitassanut Naalakkersuisoqarfimmit erseqqissaassutigineqarpoq, COVID-19-ip atuunnerata nalaani aaqqissuussinernik pilersaarusiornissamut ingerlatsinissamut maleruagassat malittarisassallu apeqqutaasut. Taamaattumik piffissaq sumiiffillu allannguuteqarsinnaassallutik.
- Piffissaliussat sumiiffissallu allanngortinneqarsinnaapput, aatsitassanut naalakkersuisoqarfimmi pisortaq Jørgen T. Hammeken-Holm ilisimatitsivoq.
