Kuannersuit: Thorium radioaktiviusoq qanoq pineqassava?
Ole Christiansenip, Kommune Kujallermi aatsitassanut siunnersortip, paaserusuppaa Kuannersuarni piiaaffimmit thorium radioaktiviusoq annertoorujussuaq Greenland Mineralsip sumut inissittarniarneraa. Ujarassiuup aamma syre annertoorujussuaq atorlugu kemiskimik saliiffimmit mingutsitsisoqarnissaa ernumanartoqartippaa.
Thorium – Kuannersuarni uranimit annertunerusoq – inissinneqartassaava?
Thorium – ukiut milliardit sinnerujussuarlugit affanngoriartortartoq – stoffiuvoq ulorianartoq. Taassuma siunissami ajoqusiinnginnissaa Greenland Mineralsip qanoq isilluni qulakkeerniarpaa?
Ole Christiansenip, Kommune Kujallermi aatsitassanut siunnersortip, Kuannersuarni aatsitassanik qaqutigoortunik uranimillu piiaaffissap avatangiisinut kinguneqaatissai isornartoqartippai, AG allappoq.
Pingaartumik thorium ernumanartoqartippaa. Naalakkersuisut kimigiisersimapput Kalaallit Nunaanni ukiuni 150-ini aatsitassarsiortoqarsimanerani aatsaavissuaq siullermeersumik kemiskimik saliiffissuarmik pilersitsisoqassasoq, tassanilu ullut tamaasa syre annertoorujussuaq kemikaliallu allat atorneqartassapput.
Apeqqutit paaserusunneqartut
GM quppernerit 3000-it angullugit avatangiisinut nassuiaateqaraluartoq Ole Christiansenip paaserusuppaa eqqagassat radioaktiviusut qanoq pineqartassanersut.
– Kuannersuarni thorium-eqarpoq uranimit pingasoriaammik annertunerusumik. Apeqqutaavoq Greenland Mineralsip thorium ukiumut 3000 tonsi, GM-ip aatsitassanik qaqutigoortunik koncentratilioraangami sinneruttartoq, qanoq pisarniarneraa. Thorium tatsimut Taseq-mut inissittassavaat? GM-ip VVM-imut nalunaarusiamini taanna eqqartorpallaanngilaa, Ole Christiansen oqarpoq.
– Thorium Narsamiitiinnarneqassava? Imaluunniit nunamit anninneqassava pisisartunut, piiaaffimmit uranimik aatsitassanillu qaqutigoortunik pisiniartartunut? Ole Christiansen aperivoq, taannalu ujarassiuuni ukiorpassuarni Kalaallit Nunaanni aatsitassarsiornermik malinnaasimasuni misilittagaqarnerpaat ilisimasaqarnerpaallu ilagaat.
Allaaserineqartoq aviisimi AG-mi tamakkiisumik atuarneqarsinnaavoq. Aviisi uani pisiariuk: