Kuannersuit: Shenghe aatsitassanik qaqutigoortunik piiaalernissamik piseriaannaasoq
Aatsitassanik qaqutigoortunik Kuannersuarni piiaasoqalerpat piiarneqartut tamaasa, minnerulluni piginneqataasuusup Greenland Minerals Limited-ip pisiarissallugit piareersimaffigai
Greenland Minerals Limitedip piginneqatigiissutaata 12,5 procentia suliffeqarfiup Kinameersup Shenghep 2016-imi pisiaraa. Suliffeqarfik aatsitassanik qaqutigoortunik ilisimasaqarluarpoq, maannalu Shenghe Greenland Mineralsilu aatsitassat qaqutigoortut tunisassiarineqarnissaat nassiussornissaallu pillugit paaseqatigiissummik atsioqatigeeqqammerput (Memorandum of Understanding). GML-ip nutaarsiassiissutaani tamanna atuarneqarsinnaavoq.
Paaseqatigiissummi atsiorneqartumi aatsitassat qaqutigoortut Kuannersuarnit qaqinneqartut Shenghep pisiariumagai atuarneqarsinnaavoq. Nunarsuarmi akigitinneqartut naapertorlugit niuerneq ingerlanneqartassaaq.
Suliffeqarfiullu aatsitassat qaqutigoortut pisiarissanngippagit, pisisussanut allanut niuerutigineqartarnissaannut Shenghe ikiuukkumaartoq aamma isumaqatigiissutigineqarpoq.
Shenghe GML-ilu isumaqatigiissummik pituttuutaasussamik maanna isumaqatigiinniartussanngorput.