Kuannersuit: Saqitsaanneq nanginneqarpoq – inaarutaasumik itigartitsissut sapaatip akunneri arlaqanngitsut qaangiuppata piariissaaq

Narsap eqqaani Kuannersuarni saffiugassanik piiaanissamut itigartitsissummut tusarniaanermut akissut Energy Transition Mineralsip februaarimi tunniuppaa.

Naalakkersuisut taamaalillutik sapaatip akunnerisa pingasut iluanni qinnuteqaammut akissutini inaarutaasoq tunniussinnaalissavaat. Aatsitassanut Inatsisinillu Atuutsitsinermut Naalakkersuisoqarfimmi pisortaq, Jørgen Hammeken Holm, Sermitsiaq.AG-mut taama ilisimatitsivoq.

Decembarimi Energy Transition Mineralsip misissuinissamut akuersissutertik nutartertippaat, uranimillu piiaanissamut misissuinissamullu inerteqquteqarnermik inatsit piiaanissamut akuersissutiminnut atuutinngitsoq, tamanna takussutissaasoq ingerlatseqatigiiffik isumaqarpoq.

Piiaanissamut suli itigartitsisoqartoq

Naalakkersuisoqarfimmili pisortap tamanna ilumuunnginnerarpaa.

- Sivitsuineq uranimut inatsimmut tunngassuteqanngilaq. Suliffeqarfik misissuinermut aalajangersimasumik annertussusilimmik aningaasartuuteqarnermut piumasaqaatinik naammassinnissimatillugu periuseq tamanna nalinginnaasuuvoq. Taakku (Energy Transition Minerals Ltd., aaqq.) naammassisinnaalluarpaa. Tunngavilersuineq uranimut inatsimmik tunngaveqanngilaq, taanna oqarpoq.

Misissuinissamut akuersissutit inatsisip atulinnginnerani tunniunneqartut inatsimmut ilaanngitsut, naalakkersuisoqarfimmi pisortap aamma ilisimatitsissutigaa, kisianni piiaanissamut akuersissutit inatsisip akuerineqarnerata kingorna tunniunneqartussat uranimik misissuinissamut piiaanissamullu inerteqquteqarnermut ilaatinneqarput.

Uranimik akoqarpallaartoq

Piiaaffimmi uranimik 100 ppm-imik akoqarmat, tamannalu uran pillugu inatsimmi 2021-meersumi inerteqqutigineqalermat, Naalakkersuisut missiliummi tusarniaassutigineqarneqartumi piiaanissamut akuersissummik itigartitsineq tunngavilersorpaat.

Ingerlatseqatigiiffiup maanna tusarniaanermut akissutini itigartitsilluni aalajangernermut paasisatigut aamma inatsisitigut akerliliisoq nassiussimalerpaa.

Tusarniaanermulli akissutip inernera allanngortissinnaanngilaa, naalakkersuisoqarfimmi pisortaq isumaqarpoq.

- Misissuinissamut akuersissummut itigartitsinermut missiliutitsinnut tusarniaanermut akissuteqarnerat ilumoorpoq. Kisianni akissutaanni annertuumi naalakkersuisoqarfimmit Naalakkersuisunut inassuteqaatitsinnut allannguisinnaasumik nutaamik imaqanngilaq. Taamaattumik sapaatip akunneri pingasut iluanni misissuinissamut itigartitsinermut inassuteqaatip piareernissaa naatsorsuutigaara.

Aalajangerneq maalaarutigisinnaagaat

Inaarutaasumik itigartitsineq tunniunneqareerpat, ingerlatseqatigiiffik aalajangerneq pillugu ukiumi ataatsip iluani maalaaruteqarsinnaavoq.

Energy Transition Mineralsip akuersissutitik iluarsiniarlugit arlalitsigut suli ilungersuuteqarpoq. Atuinissamut tapiliussatut qinnuteqaammik tunniussaqarput. Siunnersuummi nutaamik ingerlatseqatigiiffik malmimik piiaaniarpoq, saffiugassaniillu uranimik piiaaniarpoq, uranilu qaqqamut utertillugu inisseqqillugu, suliniummi siullermi uranip piiaarneqarnissaa tuniniarneqarnissaalu siunniunneqarnikuuvoq.

Malmip nunamit qaqillugu suliarineqareerneranit, imaluunniit tuniniarnerani piiaanerunersoq saqitsaannermi apeqqutaavoq.

- Atuineq piiaanerlu immikkoortumi assigiipput, kisianni inatsimmi tamakkiisumik ersarissuunngilaq. Nunamit qaqitsigaanni tassa atuinerusoq isumaqarluinnarpugut, Jørgen Hammeken Holm oqarpoq.

Isumaqatiginninniartitsineq saniatigut ingerlasoq

Piiaanissamut qinnuteqaatip saniatigut ingerlatseqatigiiffik urani pillugu inatsisip 2021-mi atulersinneqarnera tunuliaqutigalugu isumaqatiginninniartitsinermik aallartitsivoq, tassani ingerlatseqatigiiffiup misissuinissamut akuersissutigeriigaani pisinnaatitaaffii, aamma atuinermut akuersissummik pissarsisinnaanermut piginnaatitaaneq pineqarput.

- Isumaqatiginninniartitsinermik suliaq suli ilungersuutigaarput, taannalu itigartitsissutigineqassasoq suli neriuutigaarput, Jørgen Hammeken Holm naggasiivoq.