Kuannersuit: Sapusiap atasinnaassusissaa ilisimaneqanngitsoq
Tailinginik toqqorsivissami Tasermi sapusiat sanaartornerisa ilusissaannut pilersaaruteqanngilaq. Taamaalilluni sapusiap assersuutigalugu nunap sajunnerani atasinnaassusissaa piviusumik ilisimaneqanngilaq. Taama ujarassiornermi professori avatangiisinik illersuiniaqatigiiffik NOAH aqqutigalugu Kuannersuarni suliniummut VVM-imik nalunaarusiaagallartumut allakkianik tunuliaqutaasunik takunnissinnaatitaalerismasoq, naliliivoq.
Kalaalit Nunaanni ukiuni qulini kingullerni nunap sajunneri annertuut annikitsullu 4.007-inik amerlassuseqarsimammata taakkunanngalu arlallit Narsap eqqaani pisimammata, avatangiisinik illersuiniaqatigiiffik NOAH isumaqarpoq, Greenland Minerals Ltd. (GML) Kuannersuarni nunap sajussinnaaneranut qanoq isummersorsimanersoq isiginiassallugu pissusissamisoortuusoq, Sermitsiaq allappoq.
Tassami tailingisinut toqqorsivimmi imikup radiup qinngorneranik ulorianartumik akullip 21 millioner kubikmeterinik annertussuseqartup pinngortitamut avatangiiserineqartumut siaruaannissaanik pinngitsoortitsisussami sapusiaq qanorpiaq atasinnaassuseqassava. Apeqqut tamanna tunngavigalugu NOAH allakkianik tunuliaqutaasunik 73-inik Kuannersuarni suliniummut attuumassuteqartunik takunnissinnaatitaanermik qinnuteqarsimavoq taakkualu ujarassiornermi professorimut Josef Luegerimut, Østrigimi ilisimatusarfimmut InGeomut attuumassuteqartumut, saqqummiussimallugit.
Paasissutissat amigaataasut
Allagaatinik takkunnissinnaatitaanerup NOAH-mut akuersissutigineqarneranit sapaatip-akunnera ataaseq missiliorlugu qaangiummat Aatsitassanut tunngasuni Avatangiisinut Aqutsisoqarfik aqutsisoqarfiup allagaatinik takunnissinnaatitsinermik akuersissuteqarfigisaanik aalajangiisimaneranut GML-imit naammagittaalliuummik tigusaqarpoq. Pinngortitamut Avatangiisinullu Naalakkersuisoqarfik aalajangerpoq naammagittaalliuut aalajangiinerup piviusunngortinnissaanik kinguartitsinermik malitseqartinneqassasoq, tamannalu ullut qulit ingerlareersullu pilluni.
Tamannali sioqqullugu Josef Luegerip maluginiarsimavaa, VVM-imik suliaqarnerup ukiut pingasut sinnerlugit sivisussuseqartup kingorna Tasermi tailingisinik toqqorsivissarujussuarmi sapusiat qanoq sannaqarnissaannut pilersaarutinik allaaserisanilluunniit nassaassaqanngitsoq. Taamaalilluni sapusiap qanoq atasinnaassuseqarnissaat piviusumik ilisimaneqanngitsoq, professori Sermitsiamut oqarpoq.
Allaaserineqartoq aviisimi Sermitsiami atuaruk. Aviisi uani pisiarineqarsinnaavoq: