Kuannersuit: Piiaanissamut akuersissut alloriarneq siulliinnaavoq
Tamanut tusarniaaneq naammassippat Greenland Minerals piiaanissamut akuersissut pissarsiarissaguniuk, aatsitassarsiorfiup ammarnissaanut aqqut suli sivisussaaq. Piiaanissamut akuersissut akuersinernit sisamaasunit taamaallaat siulliuvoq.
Kuannersuarni aatsitassarsiornermik suliniummut tunngatillugu oqallinneq sakkortusivoq, tamanut tusarniaanerup maanna ingerlanneqarnerani Greenland Mineralsip piiaanissamut akuersissut qanilliartornera pissutigalugu.
Kisianni piiaanissamut akuersissut aatsitassarsiorfiup siunissami qaninnermi ammarnissaanik isumaqanngilaq.
Tassami tunisassiornermut pilersaarut, matusinermut pilersaarut suliaqarnermullu pilersaarut tunniunneqaqqaassapput, kiisalu kommunimut Naalakkersuisunullu suleqatigiinnissamut isumaqatigiissut aallartinnginnermi atsiorneqaqqaartussaavoq.
Aatsitassanut Inuussutissarsiornermullu Naalakkersuisoq, Jens-Frederik Nielsen, tusagassiuutini arlalinni issuarneqarpoq, aatsitassarsiorfiup ukiup ataatsip ingerlanerani ammarneqarsinnaanera naatsorsuutigigaa.
Akuersissut siulleq ukioq manna pisinnaavoq
Tamannali ilumuunngilluinnarpoq, Sermitsiaq.AG-mut tamanna naqissuserpaa.
- Piiaanissamut akuersissut suna tamarmi iluamik ingerlassappat ukiup ataatsip ingerlanerani piareersinnaasoq oqaatigaara. Tamannalu tunniusimallunga anguniarniarpara, kisianni tamanna pissappat, ilaatigut pisuussutinut akileraarutit akilerneqarnissaannut akuersissummut isumaqatiginninniarnerit inissinneqaqqaartariaqarput, Jens-Frederik Nielsen oqarpoq.
Piiaanissamut akuersissut sumiiffimmi aalajangersimasumi misissuinissamut piiaanissamullu aatsitassamik arlalinnilluunniit aatsitassarsioqatigiiffiup kisermaassisunngornissaanut atuunnerusoq, taassuma oqaatigaa.
- Ingerlatseqatigiiffik piiaanissamut akuersissummik pissarsigaangat tunisassiornermut matusinissamullu pilersaarusiornissamut ukiunik marlunnik pingasunilluunniit oqartussat nalinginnaasumik piffissaqartittarpaat.
Aatsitassarsiornermik suliniut akuersissutinik tamanik aqqusaagaqareersoq tassaavoq Anorthositinik aatsitassarsiorfik Qaqortorsuarmi Kangerlussuup eqqaaniittoq. Tassani ingerlatseqatigiiffik suliaqartoq Hudson Mining, septemberimi 2015-imi piiaanissamut akuersissummik pissarsivoq, aatsitassarsiorfilli aatsaat ukiut sisamat qaangiummata tunisassiulerpoq. 2019-imi septembarimi.
Pilersaarutit suliarineqaleruttorput
Tamannali Greenland Mineralsimut sukkanermik pisinnaavoq. Tassami pisortaanerup, John Mairip ilisimatitsissutigaa, suliniummut tunisassiornermut matusinissamullu pilersaarutit annerpaartaat inissereerput.
- Suliassap ilarujussua suliarineqareerpoq. Ukiup ingerlanerani piareernissaat naatsorsuutigaara, John Mair, Sermitsiaq.AG-mut oqarpoq.
Greenland Minerals piiaanissamut akuersissummik pissarsissaguni, qanoq sukkassuseqarnissaanik nammineq aalajangiissasoq, Jens-Frederik Nielsenip oqaatigaa.
- Piiaanissamut akuersissutinik suliaqarnermi oqartussat kigaappallaarnerarneqarlutik isornartorsiorneqartarput. Kisianni akuerineqarpat, arsaq aatsitassarsioqatigiiffimmut tunniunneqartarpoq. Taava pilersaarutit sinneruttut inatsit malillugu piumasarineqartut qaqugukkut tunniunniunneqarnissaat utaqqineqartarpoq.
Nakkutilliisinnaatitaasut
Tunisassiornermut matusinissamullu pilersaarutit akuerineqarnerisa kingorna, suliaqarnermut pilersaarut tulliussaaq. Taannalu Jens-Frederik Nielsenip pingaaruteqarnerarpaa.
- Paragraf 86 Naalakkersuisut nakkutilliisinnaanerannut pisinnaatitaaffeqalersitsisuuvoq. Nalunaaqqaarata aggersinnaavugut, sunalu tamarmi isumaqatigiissutit naapertorlugit ingerlanersoq misissorlugu. Taamaaliortassaagullu. Akuersissutaateqartup isumaqatigiissutit malinngikkunigit, sakkortunerpaamik pisoqarnerani akuersissut tigusinnaavarput, taanna naggasiivoq.
Akuersissutit sisamat saniatigut peqatigisaanik suleqatigiinnissamut isumaqatigiissusiortoqassaaq - Impact Benefit Agreement (IBA) taaguutilik, Naalakkersuisut, Kommune Kujalliup Greenland Mineralsillu akornanni isumaqatigiissutaasussaq.
IBA-p isumaqatigiissuteqartut akornanni periutsit suleriaatsillu aalajangersaaffigisarpaat.