Kuannersuit: Narsaq siuariartortoq imaluunniit avatangiisitigut ajunaarnersuaqarfiusoq?
Kuannersuit 2021-mi akuerineqassasoq Aatsitassanut Naalakkersuisup Jens-Frederik Nielsenip neriuutigaa. Saffiugassanik qaqutigoortunik uranimillu aatsitassarsiorfissaq nuannaarutigaa. Kujataani radiup qinngorneranik, fluorimik, pujoralannik, sinnikunillu eqqaavimmit aniasoqarneranit mingutsitsisoqarnissaa ernummatigineqarpoq. Sulisartullu nunanit allaneersut 900-t ernummatigineqarlutik
Kuannersuarni aatsitassarsiorfik Kalaallit Nunaata oqaluttuarisaanerani suliniutit annerpaartarissavaat Kujataanuinnaanngitsoq, aammali nunamut tamarmut naalagaaffeqatigiinnermullu annertoorujussuarmik nassataqartussaq.
Aatsitassanut Naalakkersuisoq Jens-Frederik Nielsen aalajangiisinnaagaluarpat Greenland Minerals Australiamiunit Kinamiunillu pigineqartoq saffiugassanik qaqutigoortunik uranimillu Narsamit kilometerialunnik ungasissulimmi piaalernissamut piffissap ukiup affaanik sivisususseqartumiit ukiumik ilivitsumut sivisussusilimmut ingerlanerani akuersissuteqarfigineqassagaluarpoq, aviisi AG allappoq.
Ernumaneq annertusiartorpoq
Suliniut pillugu innuttaasunik ataatsimiititsinerit Narsami, Qaqortumi, Igalikumi, Qassiarsummi Narsarsuarmilu februaarip aallartinnerani ingerlanneqassapput.
Tamatuma peqatigisaanik suliniutipiluunerujussuup annertussutsimigut arsaattarfiit 1200-t annertoqataannik angissuseqartup avatangiisinut sunniutissai pillugit ernumaneq Kujataani annertusiartorpoq.
Allaat kommunalbestyrelsimut ilaasortani Siumumeersuni, uranimut akuersaanngilluinnarnermik atorunnaarsitsisimasumi, akerliusoqarpoq. Innuttaasunit pujoralak radiup qinngorneranik akulik, aatsitassarsiorfimmit eqqakkat, fluori aamma pinngortitamik nunalerinermillu aseruinissaq ernummatigineqarput.
Saffiugassat qaqutigoortut akigissaarput
Kisianni Jens-Frederik Nielsen aatsitassarsiorfiliornissamik tapersersuisorujussuuvoq.
- Suliniummik tapersersuisuuvunga. Kisianni iternga tikillugu misissorneqarsimassaaq avatangiisillu eqqarsaatigalugit qaffasinnerpaamik pitsaassuseqassalluni. Kalaallit Nunaanni aatsitassarsiorfinnik suugaluartunilluunniit, zinkimik, saviminermik imaluunniit saffiugassanik qaqutigoortunik aatsitassarsiorfiunersut apeqqutaatinnagu tapersersuisuuvunga. Inatsisinik malinnitsilluta sorliunersut apeqqutaanngilaq, Jens- Frederik Nielsen oqarpoq.
- Aallartinnissamut piffissaq eqqoqqissaartuuvoq. Saffiugassat qaqutigoortut akigissaarput. Tamakkua mingutsitsinnginnerusumik allanngortitsiartuaarnermut atorneqassapput. Piumaneqartorujussuupput, saffiugassat qaqutigoortut Kuannersuarniittut anorisaatini aamma biilit innaallagiartortut batteriivini kajungerisanut atorneqarsinnaammata, Aatsitassanut Inuussutissarsiornermullu Naalakkersuisoq 29-nik ukiulik Demokraatineersoq oqarpoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: