Mariane Paviasen Narsami angerlarsimavoq, ukioq mannalu siusinnerusumut sanilliullugu
qungujulanerulaarpoq. Ullumikkummi IA Naalakkersuisuni aamma Kommune Kujallermi
pissaaneqartortaavoq, oqallorissaarnerlu ersarippoq: Kuannersuarni suliniut unitsinneqassaaq.

– Piffissami sivisuumi kiisami siullermeerlunga eqqissisimanerulersimavunga. Innuttaasut
oqaloreersimapput, politikerillu tusarnaarsimapput. Maani Narsami uranisiorfimmik
aatsitassarsiorfeqassanngilagut, Mariane Paviasen sisamanik ukioqarluni Qassiarsummit
Narsamut nuussimasoq, taamanimiillu tassani najugaqarsimasoq oqarpoq.

Mariane Paviasen Kuannersuarni aatsitassarsiornissamik suliniummut innuttaasut
akerliuniarneranni nukiit ingerlatsisuusut ilagisimavaat – siullermik avatangiisinik
illersuiniaqatigiiffimmut Urani Naamik siulittaasuuffigalugu kingorna IA sinnerlugu politikeriulluni. Oktobarimi 2020-mi Mimi Karlsenimut sinniisutut Inatsisartunut ilaasortanngorpoq, apriilimilu qinersinermi taasinernik 240-nik Inatsisartunilu inissamik pissarsilluni. Mariane Paviasenip Urani Naamimi siulittaasuuffik ukiarmi Jan R. Petersenimut, Narsami aamma najugaqartumut, tunniuppaa.

Politikkerit peqataasoralugit innuttaasunik ataatsimiisitsinissat

Sulili suliassaqarpoq. Greenland Mineralsimmi Kuannersuarni suliniutini imaaliallaannaq
unitsikkusunngilaa. Akerlianik Perthimi qanittukkut ataatsimeersuartoqarnerani oqaatigaat,
Kalaallit Nunaanni politikerinik akisussaasunik sunniiniarnertik ingerlateqqinniaritsik piumasaqaatit qasukkartinniarsaralugit, assersuutigalugu isumaqatigiinniarnikkut uranimut
akuersaanngilluinnarneqarfiusumut taarsiullugu suliniutip ajornarunnaassutigisaanik
killissaqartitsiviusumik suliniummik isumaqatigiissusiornikkut.

Oqaluttuaq tamaat Sermitsiami sapaatip akunnerani matumani saqqummersumi atuaruk:

Sermitsiaq Uge 22 2021

Klik her for at læse