Kuannersuit: Isumaqatiginninniartitsinermik suliaq ETM-ip qaammatip tulliani tunniussavaa
Piiaanissamut Naalakkersuisut itigartitsinerat Energy Transition Mineralsip (ETM) pakatsissutigaa. Suliffeqarfiup isumaqatiginninniartitsinissamut suliaq Københavnimi isumaqatiginninniartitsinermut eqqartuussivimmut julimi tunniutissavaat.
Energy Transition Mineralsip Kuannersuarni suliniut pillugu isumaqatiginninniartitsinissamut suliaq Københavnimi eqqartuussivimmut susassaqartumut kingusinnerpaamik 19. juli 2023 tunniutissavaa.
Suliffeqarfik taama aalajangerpoq suliffeqarfiup Kuannersuani aatsitassanik piiaanissamut qinnuteqaataa Naalakkersuisunit itigartinneqareersorlu. Suliffeqarfiup aatsitassat qaqutigoortut, zink aamma uran piiassallugit qinnuteqaat 17. juni 2019 tunniuppaat, qinnuteqaammullu tapiliussaq decemberimi 2022 tunniullugu.
Energy Transition Mineralsip Naalakkersuisullu akornanni saqitsaanneq maanna sukanganerulerpoq, piiaanissamut akuersissummik Naalakkersuisut tunniussaqanngimmata.
Aalajangerneq pakatsissutigaat
Piiaanissamut akuersissuteqarnissamut qinnuteqaat ukiuni arlalinni suliarineqarpoq. Suliallu ingerlanerani uran pillugu inatsimmut nutaamut naapertuuttunngortitsiniarluni Energy Transition Minerals tapiliussamik qinnuteqarsimavoq.
- Kalaallit Nunaanni Naalakkersuisut qinnuteqaatitsinnik itigartitsinerat pakatsissutigalugu oqaatigiumavarput. Taama aalajangertoqarnerani allatut iliorsinnaanngilagut, taamaallaat isumaqatiginninniartitsinermut eqqartuussivimmut suliamik tunniussinissaq. Suliamik tunniussinissaq siunniupparput suliaq naapertuuttumik eqqortumillu aaqqiivigineqarnissaa siunertaralugu, Energy Transition Mineralsimi pisortaaneq, Daniel Mamadou tusagassiorfinnut nalunaaruteqarnermi oqarpoq.
Naalakkersuisut itigartitsinermut tunngavilersuutit suli saqqummiutinngilaat.
Piiaanissamut qinnuteqaat tapiliussaq suli aalajangiiffigineqanngilaq
ETM naapertorlugu suliffeqarfiup tapiliussatut qinnuteqaataa 16. december 2022 tunniunneqartut Naalakkersuisunit suli aalajangiiffigineqanngilaq.
Tapiliussatut qinnuteqaammi suliffeqarfiup saffiugassat qaqutigoortut zinkilu kisiisa piiassallugit qinnutigaat, uranilu tailingsituulli nunamut matooruteqqitassatut suliarissallugu suliassami nassuiarlugu.
- Isumaqarpugut suliniutitsinnut inatsisit malittarisassallu naapertuuttut atorneqartariaqartut, isumaqarpugullu aningaasaliisugut, sulisugut inuiaqatigiillu suliffeqarfigisagut aamma paarisariaqarneri pingaaruteqartoq.
- Anguniagariinnanngilarput aningaasaqarnikkut siuarsaanissaq, anguniakkatsinnut aamma ilaavoq avatangiisip mingutsinnagu paarineqarnissaa, suliniutigisarput tamanut iluaqutaasussanngorlugu, Daniel Mamadou oqarpoq.
Energy Transition Minerals ilisimatitsivoq Naalakkersuisut paasititsisimasut tapiliussatut piiaanissamut qinnuteqaat 16. december 2022 tunniunneqarsimasoq, tusarniutigineqareerpat aalajangiiffigineqarumaartoq.