Kuannersuit: Akileraartartut akiligaannik innuttaasunik ataatsimiititsinerit

Kujataani Kuannersuarnut pilersaarutit pillugit aggustip naalernerani innuttaasunik ataatsimiititsinerit 700.000 koruuninik aningaasartuutaanissaat missingersuusiorneqarput. Upernaaq innuttaasunik ataatsimiititsinerit Greenland Mineralsimit akilerneqarput, maannali ataatsimiititsinerit Namminersorlutik Oqartussanit akilerneqartussaapput.

Naalakkersuisunut ilaasortat, atorfilittat aamma Kommune Kujallermit peqataatitat saniatigut Greenland Mineralsimeersut pingasut aggustip 23-annit 28-annut innuttaasunik ataatsimiititsinernut peqataassapput.

Aatsitassanut Naalakkersuisoqarfiup Kujataani Kuannersuit pillugit innuttaasunik ataatsimiititsinissat aggustip 23-annit 28-annut pisussatut pilersaarutigineqartut 700.000 koruuninik aningaasartuutaasussatut missingersuusiorpai. Ataatsimiititsinissanut aningaasartuutaasussat tamatumuuna Namminersorlutik Oqartussanit akilerneqartussaapput.

Allagaatinik takunnissinnaatitaaneq aqqutigalugu Sermitsiap Naalakkersuisoqarfimmit paasisaats tamanna paasinarsisippaat.

Nalinginnaasumik aatsitassarsiortitseqatigiiffiup – tassa matumani Greenland Mineralsip – piiaasinnaanissamut qinnuteqaatip suliarineqarneranut atatillugu innuttaasunik ataatsimiititsinermut aningaasartuutit akilertussaavai.

Greenland Mineralsimmi aamma innuttaasunik ataatsimiititsinernut aningaasartuutit aamma akilereersimalerpai; tassa innuttaasunik ataatsimiititsinernut februaarimi 2021-mi pisunut atatillugu. Taamani qaartartumeerinissamik sioorasaarisoqarnera patsisigalugu Naalakkersuisunut ilaasortat peqataannginnissartik toqqarmassuk.

Oqallinnissaq aamma allanut tunngassutilik

Naalakkersuisut innuttaasunik februaarimi ataatsimiititsinernut peqataaniarnatik namminneerlutik aalajangernerat qularnanngitsumik patsisaalluni, innuttaasunik ataatsimiititsinerit maanna akilertussanngorpaat. Aatsitassarsiortitseqatigiiffiup innuttaasunik ataatsimiititsinernut aningaasartuutinik akiliisussaannginnerata kinguneranik qularnanngitsumik Naalakkersuisut Kujataani innuttaasunik ataatsimiititsinerminni pilersaarutinik allanik akisussaaffinnullu allanut tunngasunik oqaluuserinninnissaminnut periarfissaqarnerussapput.

Suliamut atatillugu naalakkersuisup Naaja Nathanielsenip oqaaseqaataa, oqaluttuallu sinnera Sermitsiami sapaatip akunnerani matumani saqqummersumi atuarsinnaavatit, ugguuna aviisi iserfigisinnaavat:

Powered by Labrador CMS