Kuannersuit pillugit tusarniaaneq ullumi naammassivoq
Greenland Mineralsip Kuannersuarni aatsitassarsiorniarlutik suliniutaat pillugu susassaqartut soqutigisaqartullu siorna 18. decemberimili tusarniummik ilanngussaqarnissamut periarfissaqarsimapput.
Kuannersuit pillugit VSB-mut aamma VVM-imut nalunaarusiat tusarniutigineqarnerat ullumi nalunaaqutaq 16.00 naammassivoq.
Tusarniutigineqarnerani isummersuuteqartut arlalissuupput. Naalakkersuisut tusarniaanermut tunngatillugu nittartagaanni 30-t sinneqartut tunniussisimasut, UANI takusinnaavatit.
Nunatsinni nunanilu allani innuttaasut, immikkut ilisimasallit nunanit allaneersut, soorunanilu Kommune Kujallermi, Sulisitsisuni, aalisarnermut piniarnermut naalakkersuisoqarfimmit kiisalu ilinniartitaanermut, kulturimut ilageeqarnermullu naalakkersuisoqarfimmiit tusarniaanermi isummersuutinik apuussaqarsimapput.
Tusarniaaneq naammassippat tusarniutigineqarnermi isummersuutit, suliniummut apeqqutaanerusut, hvidbogimut katersorneqassapput. Taanna tamanut saqqummiunneqassaaq.
Suliassanngornissaa ungasittoq
Apeqqutit tamarmik akineqassapput, Naalakkersuisut hvidbogip imarisaa akuersissutigissavaat. Aatsaallu taakku naammassippata Greenland Minerals piiaasinnaanermut akuersissuteqarnissamut qinnuteqarsinnaalissaaq, tamannali IA Nalerarlu naalakkersuisuutillugit ajornaatsuinnaanavianngilaq.
Inatsisartut ukiaanerani ataatsimiinnissaannut uranimut naaggaarluinnarnerup atuutilerseqqinnissaannut siunnersuut ilanngunneqarsimavoq. IA aamma Naleraq qineqqusaarnermi Kuannersuarni uranip saniatigut piiarneqarnissaa akuerinagu oqariartuuteqarsimapput.
