Kuannersuit pillugit tusarniaaneq maanna aallartippoq

Greenland Minerals A/S-ip Kuannersuarni aatsitassanik qaqutigoortunik piiaanissamut suliniutaani ASN-imik nassuiaatip aamma ISN-imik nassuiaatip tamanut tusarniaassutigineqarnissaata aallartinnissaa Naalakkersuisut decembarip 17-anni akuersissutigaat.

Kalaallit Nunaanni aatsitassarsiornermik suliniutit annersaat aamma isumaqatigiinngissutaanerpaasoq aqagu tallimanngornermit tusarniaassutigineqalerpoq.

Narsap eqqaani Kuannersuarni aatsitassarsiornermik suliniut pineqarpoq, tassani Greenland Minerals A/S aatsitassanut qaqutigoortunut aamma uranip saniatigut piiaanissamut akuersissumik pissarsiniarsarivoq.

Aatsitassarsiornermik suliniut sivisuumik ingerlanneqartoq pillugu innuttaasorpassuit akerliussutsimik takutitsisareerput, uranip saniatigut qallorneqarnissaa ernumassutigineqarnera, tamatumalu avatangiisinut peqqissutsimullu qanoq sunniuteqarsinnaanera pissutaallutik. Illuani akuersaartut suliffinnik pilersitsinissamut tunngatillugu aamma nunap immikkoortuani ineriartortitsinissamut isumalluarput, kiisalu suliniutaalersussami akileraarutitigut isertitassat eqqarsaatigalugit.

Kikkut tamarmik tusarniaanermut peqataasinnaapput
Tamannalu sivisuumik suliarineqarsimasoq, Inuussutissarsiornermut Aatsitassanullu Naalakkersuisoq, Jens-Frederik Nielsen tusarniaanerup aallartinneqarneranut atatillugu oqaatigaa.

- Tamanut ammasumik tusarniaassutigineqarnerata aallartinneqarnera Nunatsinnut alloriarneq pingaaruteqarpoq, tamanna sivisuumik utaqqineqarpoq, taanna oqarpoq.

Piffissami tusarniaaffimmi illuatungeriit soqutiginnittut tamarmik oqaaseqaatiminnik ernumassutiminnillu tunniussinissaminnut periarfissinneqassasut, Jens-Frederik Nielsenip naqissuserpaa.

- Oqaaseqaatit tamarmik suliarineqarlutillu tusarniaanermit nalunaarusiami akineqassapput, ASN-inik nassuiaatip ISN-imillu nassuiaatip nutarteqqinneqarnissaanut tunngaviliissallutik, taanna ilisimatitsivoq.

Sumiiffinni arlalinni tusarniaalluni ataatsimiinnerit
Tusarniaaneq 18. december 2020 aallartinneqassaaq, saapaatip-akunnerilu 12-it qaangiunneranni 12. marts 2021 naammassineqassalluni. Piffissami tusarniaaffiusumi Igalikumi, Narsami, Narsarsuarmi, Qaqortumi aamma Qassiarsummi tusarniaalluni ataatsimiititsisoqassasoq Naalakkersuisut aalajangerpaat. Tusaniaatitsinissanut piffissaliussat Naalakkersuisut nittartagaanni nalunaarutigineqassapput.

Tusarniaanermi atortussiat tamanut saqqummiunneqarnerat Naalakkersuisut tusarniaanermi atortussianik inaarutaasumik akuersinerattut paasineqassanngitsoq, Namminersorlutik Oqartussat naqissuserpaat.

- Taamatut akuersineq aatsaat IBA-mik atsiornikkut qalluinissamillu akuersissummik tunniussisoqarneratigut pissaaq, taama ilisimatitsipput.

Kalaallisut, qallunaatut tuluttullu tusarniaanermut atortussiat kiisalu pappiaqqat tunuliaqutsiissut UANI nassaarineqarsinnaapput.

Powered by Labrador CMS