Kuannersuarni suliniut qanittumi aallartinnavianngilaq

Greenland Mining and Energy, GME, Narsap eqqaani Kuannersuarni aatsitassarsiornissamik qinnuteqaat 2014-ip aallartilaarnerani tunniuttussaagaluaraa tamatuma akuerisaanerani itigartinneqarneranilluunniit akissut sivisuumik utaqqineqartussaavoq. Aatsitassatut inuussutissarsiornermullu naalakkersuisoq Jens-Erik Kirkegaard Siumumeersoq Weekendavisenimut erseqqissaavoq Inatsisartut siulittaasuata Lars-Emil Johansenip GME-mi siulersuisuni siulittaasuusimanera qinnuteqaatip suliarineranut sunniuteqarnavianngitsoq.

GME siusinnerusukkut nalunaareerpoq Kuannersuarni aatsitassarsiornissamik qinnuteqaat 2014-ip aallartilaarnerani tunniutissallugu. Akissutisinissaminnulli utaqqingaatsiassapput. Naalakkersuisullumi kissaatigaat aatsitassat sapinngisamik Nunatsinni suliarineqartalissaasut.

Lars-Emilip inissisimanera
- Periarfissat arlaqarput. Aallaavittut kissaatigaarput aatsitassat Kalaallit Nunaanni suliarineqassasut. Tamanna suliffissatigut isertitatigullu pissarsissutaanerussaaq. Nunatut siuarsagassatut inissiinnarusunngilagut aatsitassarsiortitseqatigiiffiit imaajaannariarlugu qimatassaattut. Taamaammat kissaatigaarput aatsitassarsiorfiup eqqaani suliarinneqqittarfeqalernissaa. Tamannali aatsaat pissaaq peqqinnissakkut illersorneqarsinnaasumik ingerlanneqarsinnaappat aammalu avatangiisinut mianerinniffiusinnaappat. 2014-ip ingerlanerani GMEp qinnuteqaataata tigunissaa naatsorsuutigaarput. Qinnuteqaatilli suliarinera sivisussaaq tamanna sukumiilluinnartumik suliarineqartariaqarmat, Jens-Erik Kirkegaard Weekendavisenimut oqarpoq.

Inatsisartut siulittaasuat Lars-Emil Johansen Siumumeersoq GME-mi siulersuisuni siulittaasuunikuuvoq. Taassumali GME-mut attuumassuteqarsimanerana qinnuteqaatip suliarineqarneranut sunniuteqarnavianngitsoq Jens-Erik Kirkegaard oqarpoq.

- Inuit ataasiakkaat oqaaseqaattaat inassutaallu tunngavigalugit aalajangerneq ajorpugut. Aalajangernerit pisarput suliamut ilisimaarittut suliaat tunngavigalugit, Jens-Erik Kirkegaard Weekendavisenimut oqarpoq.

London Mining Isuani aatsitassarsiorniarluni qinnuteqarnerminiit ukioq ataaseq sinnerlugu utaqqereerluni akineqarpoq.