Skip to main content

Kuannersuarni aatsitassarsiorniarneq pillugu partiit imatut isumaqarput

Sermitsiaq.AG partiit Narsap eqqaani aatsitassarsiorniarnermut akerlerineqaqisumut isumaat tusarniarlugu sianeqattaarsimavoq.

Kujataaniittumi Kuannersuarni aatsitassarsiorniarneq pillugu innuttaasut ullualunnguit qaangiuppata ataatsimiisinneqarnissaat allatissaaq.

Tassunga atatillugu Sermitsiaq.AG-p partiit aatsitassarsiorniarnermut isumaat tusarniarlugu apeqquteqarfigisimavai. Partii ataaseq suliniummut isumaqataalluinnarpoq, allat innuttaasunik taasititserusupput, partiip ataatsip suliniut taamaativinneqassasoq kissaatigaa. Partii ataaseq saaffiginnissutitsinnut akissuteqarsimanngilaq.

Partiinut tamanut apeqqutigineqarsimasoq tassaavoq:

Kuannersuarni aatsitassarsiorniarnermut pisortatigoortumik qanoq isumaqarpisi?

Atassut:

- Apeqqummut aalajangersimasumik isumaqanngilagut, neriuutigaarpulli suliniut pillugu innuttaasut taasitsinneqarumaartut. Innuttaasut amerlanerussuteqartut isumaat ataqqissavarput. Narsap eqqannguani aatsitassarsiortoqarniarpoq, taamaammat uagutsinnut pingaaruteqarpoq innuttaasut tusarniaaffigineqarnissaat, Atassummi siulittaasoq Aqqalu Jerimiassen oqarpoq.

Demokraatit:

- Siullertut oqaatigerusuppara, Kalaallit Nunaata allatigut isertitaqarsinnaaneq pisariaqartimmagu. Maannakkut inissisimanerput naammanngilaq, suliffissammi nutaat innuttaasunut iluaqutaasussat pisariaqartinneqarput. Neriuutigaarput upperilluinnarlugulu avatangiisinut innuttaasunullu kinguneqaataasinnaasut ukioq manna akuerineqarnissaat. Aatsitassarsiorniarnerup aallatinneqarnissaanut piumasaqaatit tamarmik naammassineqarpata tapersersuinissatsinnut piareersimavugut, Demokraatit siulittaasuat Jens-Frederik Nielsen oqarpoq.

Partii Naleraq:

- Suliniummut tapersersuinngilagut, innuttaasunummi Narsallu eqqaani avatangiisinut kinuneqartussaammat. Erseqqissaatigissavara siunertaq inuiaqatigiinnut iluaqutaasussaq tapersersoratsigu. Suliniutilli matuma kingunerisaanik innuttaasut sumiiffimmit qimagussortittussaavai, tamannalu akisunaarneqartussaavoq. Suliniut tapersersunngilarput, aamma tusarniaanissat iluaqutaangaarnavianngillat, Naalakkersuisummi suliniutip aallartinneqarnissaanik aalajangereersimapput, Partii Naleraq sinnerlugu Inatsisartuni ilaasortaq Pele Broberg oqarpoq.

Siumut:

Siumumi siulittaasunngorlaap Erik Jensenip Kuannersuit pillugit siulittaasup tulliata Vivian Motzfeldtip tusagassiorfinnut nalunaarutaa innersuussutigaa, taannalu partiip suliniummut pisortatigoortumik isumaatut oqaatigalugu.

Tusagassiorfinnut nalunaarummi ilaatigut allassimavoq: 'Ilisimatuussutsikkut tunngaveqartumik tusarniaanerit  ingerlanneqarlik. Qulequttami taamak pingaaruteqartigisumi arlaannaannulluunniit pituttorsimanngitsunik ilisimatuussutsikkut tunngaveqartumik tusarniaanerit ingerlanneqarnissaat kissaatiginarpoq. Inuk kinaluunniit tunngavissalimmik aalajangiisinnaassuseqalersarpoq ilisimasanik paasisimasanillu pituttugaanngitsunik sakkussaqaleraangami.'

'Qulequttami taamak annertutigisumi akerleriinnerillu avissaartuuffiusut taamak annertutigitillugit, aqqutissanik nutaanik ujartuisariaqarpugut, inuiaat taamak ikitsigaluta ataatsimuussuseqarnermik misigissuseq innarlitsaalisassatsinni pingaarnerpaajuvoq.

Iliuutsivummi suulluunniit tamarmik kinguneqarput aamma taamaappoq iliuuseqannginneq, taamaammat nalunaarut una qanoq ililluta alloriaqqinnissatsinnik neriuppunga isummat avissimasut katersuuffissaqarnanut naaperiaasinnaanermullu aqqutissiuusseqataasinnaassasoq.'

Inuit Ataqatigiit:

Illuatungiliuttut partiiani siulittaasup tullia Aqqaluaq B. Egede oqarpoq, partii suliniummut akerliulluinnartoq:

- Suliniut pillugu nalunaarusiaq peqqissaarulluinnarlugu misissorsimavarput. Suliniut piviusunngortinneqassaguni Narsap eqqaani innuttaasunut, savaatilinnut avatangiisinullu annetoorujussuarmik kingunerluuteqartussaavoq. Partiit naalakkersuisooqataasut suliniut pillugu innuttaasunik uukapaatitsiniarlutillu kusassaapput. 

- Ajorluinnartumilli kinguneqartussaavoq, sumiiffimmi isertitaqarnissamut tunngavissatut pilersinneqarsimasut ajoquserneqassapput, soorlu aalisarneq, nunalerineq minnerunngitsumillu ulluinnarni inuuneq. Sumiiffmmi avatangiisit ajoqusinngikkaluarlugit isumalluutissarpassuit aallartinneqarsinnaapput, soorlu assersuutigalugu aalisakkani qajuusaasiat, pinnersaasiorneq qammasissiorfillu Siku Block. Tamaasa ataatsimut isigalugit Kuannersuarni aatsitassarsiorniarneq akerleraarput, Aqqaluaq B. Egede erseqqissaavoq.

Nunatta Qitornai:

- Kalaallit Nunaat nunap pissarititai tunngavigalugit piorsarneqassaaq. Nunatta Qitornaanit upperaarput Kalaallit Nunaat pisuussutit uumassusillit uumassuseqanngitsullu atorlugit namminersulivissasoq, sapinngisamillu taakku atorneqassapput. Sulinummut tunngatillugu oqaatigissavara, aatsitassanut inatsit partiit tamarmiullutik tapersersugaat aatsitassarsiorfiup ammarneqarnissaanut tunngaviussasoq. Aatsitassanut inatsit aatsitassarsiorfissap ammeqarneqarnissaat ammannginneqarnissaanullu sinaakkutaassaaq, Nunatta Qitornai sinnerlugit Inatsisartuni ilaasortaq Aleqa Hammond oqarpoq.

Sermitsiaq.AG-mit Suleqatigiissitsisut oqaaseqartinneqarsinnaasimanngillat, naak siulittaasoq Tillie Martinussen siulersuisunilu ilaasortat arlalerialuni saaffigineqartaraluartut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER