Skip to main content

Kuannersuarmut suliniummut Siumumi politikerimit akerlerineqalerpoq

Kommune Kujallermi kommunalbestyrelsimi ilaasortap Benjamin Kielsenip (S) Narsap eqqaani aatsitassarsiornissaq tapersersorunnaarpaa.

Greenland Mineralsip Narsap eqqaani aatsitassanik qaqutigoortunik piiaanissaanut Benjamin Kielsen siornatigut tapersersuisareersimalluni maanna suliniummut tapersersuiunnaarluni nalunaaruteqarpoq.

Suliniut kujataani fenruaarimi tusarniutigineqassaaq.

- Aalisartut, piniartut aamma savaateqarnermik inuussutissarsiuteqartut ernumassutaat tusaavakka. Nunalerineq pillugu Siunnersuisoqatigiinni aamma ilaasortatut qanimut oqaloqatigisarpakka, ernumassutaallu paasisinnaavakka. Tamakku pissutigalugit suliamut tapersersuiunnaarpunga, Kommune Kujallermi kommunalbestyrelsimi ilaasortaq Benjamin Kielsen Sermitsiaq.AG-mut oqarpoq.

Innuttaasut illoqarfik qimakkusukkaat

Narsami innuttaasut arlaqartut siornatigut piiaanissamut akuersaarsimasut, maanna akerliulersimasut Benjamin Kielsenip malugaa.

- Aatsitassarsiorfik ammassappat innuttaasut arlaqartut oqariartuuteqareerput illoqarfik qimanniarlugu. Aamma nammineerlunga aperisarsimavunga, illoqarfimmi maani kikkut inooqatigerusuppakka? Aatsitassarsiornermik suliaqartut imaluunniit maannakkut illoqarfeqatikka? Apeqqut taanna uannut ajornanngilaq, tassami maannakkut illoqarfeqatikka soorunami inooqatigerusuppakka, oqarpoq.

Naak partii ilaasortaaffigisaa, Siumut, uranitalinnik piiaanissamut akuersaaraluartoq, Benjamin Kielsenip partii qimannianngilaa.

- Kujataani Siumumi grupperput nalunaarfigereerpara suliniummut akerliulerlunga. Tupaallaatigisannik saaffigineqartarpunga tapersersorneqarlunga. Kuannersuup eqqaani aatsitassarsiornissaq akerlerilerpara, sumiiffimmi allami uranitalinnik piiaasoqalissappat nalilersueqqaassaanga tapersersuissanerlunga tapersersuissannginnerlungaluunniit, Benjamin Kielsen oqarpoq.

Suut aarleqqutigigakkit isummat allanngortippiuk?

- Aatsitassarsiorfiup ammarneqarnerata pissutigisaanik innuttaasooqatitta aallarnissaat inooqataaffigisinnaannginnakku taamatut aalajangerpunga. Ernumasut tusaavakka, aallarnissaallu kissaatiginngeqaara. Aamma kemiskimik aatsitsiveqalernissaa akerlerisuaannarnikuuara, akivoq.

Coronap nalaani tusarniaaneq

Kujataani aatsitsiviup piiarneqalernissaanut tunngatillugu tusarniaasoqassaaq februaarimi. Narsami innuttaasut peqataatinneqarluarnissaat Benjamin Kielsenip kissaatigaa.

- Illoqarfittami siunissaa eqqartorneqassaaq, aamma apeqqut taanna pillugu illoqarfitsinni aalassassimaartoqarpoq. Taamaattumik uggornarpoq tusarniaaneq coronap nalaani ingerlanniarneqarmat, tassami inuit 100-innaat isersinnaassapput tusarniaanermi. Tusarniaasoqassappat arlaleriarluni tusarniaasoqartariaqarpoq, innuttaasut amerlanerpaat peqataanissaat anguneqassappat, oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER