KTI-p atuartut tikilluaqquai
Qeqqata Kommuniani 9. klassemi atuartut assassorluni sulineq pillugu ullormi ataatsimi sammisaqartinneqarput. Sammisaqartitsineq KTI Inuussutissarsiornermi Ilinniarfiup Qeqqata Kommuniatalu Nordeafondemit tapersersorneqarlutik suliaraat.
- Ulloq siunissamut aningaasaliineruvoq, atuartullu assassornermi ilinniagaqalernissaminnut soqutiginninnerulernissaannut kajumissaataalluni, meeqqat assassornermik misiliiffissaat, KTI tusagassiutinut nalunaaruteqarluni allappoq.
KTI Teknikkimik Ilinniarfimmi stafetti 2019-ip meeqqat atuarfiani 9. klassemi atuartut 123-it ataasinngornermi oktoberip arfineq-aappaani sammisaqartinneqarnissaannut tikilluaqquai. Meeqqat atuarfianni naammassisut amerlanerusut assassorluni sulinermik ilinniagaqartalernissaat neriuutigineqarpoq.
Sisimiuni Minngortuunnguup Atuarfinit Nalunnguarfiullu atuarfianit, Maniitsumi Atuarfik Kilaaseeqqamit aamma Kangaamiut atuarfianit, Qinnguata atuarfianit kiisalu Kangerlussuarmi ungeinstitution Orpigarmit atuartut peqataatinneqarput, ilinniarfimmi ilinniartitsisut assassorluni sulinermi sulianik assigiinngitsunik saqqummiipput, atuartullu assassornermik suliaqarlutik unammisinneqarlutik. Unamminerup kingorna ajugaasut pinnatassaqartinneqarlutik.
Assassorluni ilinniagaqartut amigaatigineqartut
Qeqqata Kommuniani borgmester Malik Berthelsen ammaanermi atuartunut oqalugiarpoq, erseqqissaatigalugu Kalaallit Nunaata ineriartornerani assassorluni suliaqartut pingaaruteqartut.
- Ukiuni makkunani aningaasarsiornikkut ingerlalluarnitta kinguneranik assassornermik suliallit assorujussuaq amigaatigineqarput, taamaattumik taakkununnga sammisumik aamma ilinniagaqarussi qularutigissanngilarsi pinngitsoorasi suliffittaassaqqaarassi. Eqqaamassavarsilu sulisitsisut piumasaqaataat pingaarneq tassaammat piffissamik suliffimmillu
ataqqinninneq, taakkua pigigussigit taava sulisitsisuniit erligineqassaasi, atuartunut oqarpoq.
KTI-mi ilinniagaqarnermi pisortaq John Plambek oqalugiarnermini assassornermik suliaqartut amigaataanerat aamma taavaa.
- Kalaallit Nunatsinni assassorlutik ilinniarsimasunik amigaateqarpugut. Meeqqat atuarfiini naammassisimasut assassorluni sulinermik ilinniagassanik toqqaasartut ikippallaaqaat. Assassorlusi sulinissigut pilersitassi naammassisassilu nuannaarnermik
tunisarpaasi. KTI Teknikkimik Ilinniarfimmi meeqqat atuarfiani naammasisimasunik assamminnillu atuerusuttunik amigaateqarpugut. Assassorlutik sulinermik ilinniagaqarsimasut torrassuupput, oqarpoq erseqqissaatigalugu assassorluni ilinniagallit pigineqanngitsuuppata taava atuarfeqaranilu, timersortarfeqaranilu, filmertarfeqaranilu illoqarnavianngitsoq, soorlu aamma tunisassiorfeqarnavianngitsoq.
Ulloq naammassillugu peqataasut grillereqatigiipput.