KTI maskinmesterinngorniarfimmik pilersitsisoq
Kalaallit Nunaanni maskinmesterinngorniartut siulliit 2022-mi januaarip qaammataani aallartissapput. Københavnimi Maskinmesterskolip nunamilu maani Teknikimik Ilinniarfiup (KTI) ukiuni marlunni suleqatigiissimanerisigut maskinemesterinngorniartarneq nunatsinni kiisami periarfissaalerpoq.
Kalaallit maskinmesterinngorniartut siusinnerusukkut Danmarkimi ilinniartarput. Maannali Sisimiuni aamma ilinniarsinnaanngorput.
- Nuannaarutigeqaarput Maskinmesterskolen Københavnimik suleqateqarsimanerput aamma ilinniarfimmi ataatsimi ilinniagassatut neqerooruterpassuit ataatsimoortissinnaaleratsigit. Ilinniaqqinnissamut piareersarluni, inuussutissarsiutinik ilinnigaqarnissamut, professionsbachelorinngorniarluni, nangitsiviusumik ilinniagaqarnissamut ph.d.-nngorniarnissamullu ilinniagaqarsinnaanerit KTI Sisimiuni neqeroorutigineqarsinnaanerat immikkuullarissuuvoq, KTI-mi forstanderi Jokum Møller oqarpoq.
Ilinniagaqarneq nunamut pingaaruteqarluinnartoq
KTI naapertorlugu Kalaallit Nunaanni suliffeqarfiit ilinniartoqarfiillu suliassanut ilinniagallit, imarsiortuni, nukissiuuteqarnermi tunisassiornermilu maskiinanik ingerlatsillutillu aserfallatsaaliuisinnaasut pisariaqartilluinnarpaat.
Kalaallit Nunaanni sanaartornerup attaveqaasersuinerullu ineriartornera ilutigalugu pisariaqartitsineq tamanna annertusiartuinnartussaavoq, KTI-mi forstanderi Jokum Møller Københavnimilu ilinniartitaanermut pisortaq Tommy Birkebæk ilanngussillutik oqarput.
Maskinmesterit Danmarkimi Kalaallillu Nunaanni sulisoriumaneqartupilussuupput.
Kalaallit Nunaanni maskinmesterinik 2020-mi sulisussaaleqisoqarsimanngilaq, Kalaallillu Nunaanni Sulisitsisut 2020-mi paasisimavaat, Kalaallit Nunaanni suliffeqarfippassuit ilinniagaqarsimasut 55,6 %-iinik amigaateqartut.