Kruse: Pisassiissutitaqanngitsumik decemberimi januarimilu piniartoqartalerli
Siumut sinnerlugu Inatsisartuni ilaasortaq, siusinnerusukkut aalisarnermut, piniarnermut nunalerinermullu naalakkersuisoq, Karl Kristian Kruse piumasaqarpoq pisassiissutitaqanngitsumik qilalukkanik qaqortanik, qernertanik nannunillu piniartoqarsinnaalissasoq.
Inatsisartuni amerlanerussuteqartunit tunuliaqutserneqarluni Karl Kristian Kruse (S) 2014-mi qaleralinniarfinnik pisassiinertaqanngitsumik aalisarfiusinnaasunik aqutsiveqarfinni Upernavimmi, Uummannami aammalu Qeqertarsuup tunuani ammaassisitsivoq. Maanna 2019-mi parteeqataata aammalu naalakkersuisutut paarlattaata pisassiissutitaqanngitsumik aalisarfiit pineqartut matuniarlugit sulissutiginnippoq.
Aviisi Sermitsiaq taama allaaserisaqarpoq.
Taamaakkaluartoq Karl Kristian Kruse-p tamanna uniffiginagu maanna assingusumik siunnersuuteqarpoq. Tamatumuuna inuussutissarsiutigalugu piniartunut aammalu sunngiffimmi piniartunut qaammatini decemberimi januarimilu killilersugaanngitsumik qilalukkat qaqortat qernertallu aammalu nannut piniarneqarsinnaalissasut. (UPA2019 imm. 193, aaqq.)
Karl Kristian Kruse-p taamatut siunnersuuteqarnermini ilaatigut tunngavilersuutigaa ”2004-mi qilalukkat qernertat qaqortallu kiisalu 2005- mi nannut eqqissisimatitaalernerisa kingorna Nunatta sineriaani isorartuumi amerlavallaalersimasut.” Taamatuttaaq tunngavilersuutigaa, piffissaq pineqartoq, december aamma januar ukiup taarnerpaaffigisarmagu piniakkanut pineqartunut ataatsimilluunniit ikiliartuutaassanngitsut.”
Suliaq pillugu Sermitsiami paasisaqarnerugit – uani ataani linki aqqutigalugu isissutissarsigit: