Kruse: Aalisarnermut inatsimmut siunnersuut iluarsaanneqassaaq
Aalisarnermut inatsimmut siunnersuut nutaaq ukiaq ataatsimiinnermi siullermeerneqartumit allaanerusumik iluseqasssasoq, Siumumeersoq Karl-Kristian Kruse oqarpoq.
Qinersisoqarnissaa pissutigalugu aalisarnermut inatsisissatut siunnersuut assortuussutaasoq atorunnaarsinneqarpoq, Naalakkersuisunngortussallu siunnersuummik nutaamik saqqummiussissapput.
Isornartorsiornermut tusarnaartut
Siumut aalisarnermut piniarnermut naalakkersuisuutitaqaannassappat, marlunngornermi tusagassiortunik katersortitsinerup kingorna, Sermitsiaq.AG-p apeqqutit uku Karl-Kristian Krusemut apeqqutigai.
Ukiuunerani ataatsimiittoqarnerani aalisarnermut inatsissatut siunnersuut iluseqartillugu saqqummiuteqqinniarpiuk?
- Siullermeerneqarerata kingorna isornartorsiornermut tusarnaarnikuuvugut, aalisarnermut inatsisissamut siunnersuutip nutaap iluarsaanneqarnissaa pilersaarutaavoq, Karl-Kristian Kruse ilisimatitsivoq. Sutigulli allannguisoqassanersoq oqaatigerusunngilaa.
Inatsisartut inissisimanerat
Qinersinerup kingorna Inatsisartut qanoq inissinnerat apeqqutaalluni, aalisarnermut inatsisissap qanoq aaqqinneqarumaarnersoq, Kim Kielsenip Sermitsiaq.AG-mut nassuiaavoq.
Amerlanerusut imaani pisuussutinik aalisarsinnaanissaat pingaarnertut tunngaviusumik suli aalajangiusimaneqarpoq, Siumup qinersinissamut anguniagaani inuusuttut aalisartunngorsinnaanerannut periarfissat pitsanngortinneqassasut aamma sinaakkutissat iluarsineqassasut oqaatigineqarpoq.
Aalisarnermut aningaasaliineq nutaaq
Qinersinermi anguniagassani ima allaqqasoqarpoq:
- Imartatsinni aalisagartassiissutit amerlanerusut atorluarnerunissaat aqqutissiuullugu, ukiunut arlariinnut pisassiisoqartalernissaanik periarfissiilluni, inuussutissarsiummi tassani kattuffiit aningaaseriviillu suleqatigalugit aningaasalersueriaatsinik nutaanik pilersitsisoqarsinnaanera ilanngullugu suliarineqassaaq, Siumup qineqqusaarutaani tamanna allaqqavoq.