siunnersuineq
Kruse: Uumasorsiuut qaleralinnik misissuinerat naammanngilaq
Aalisarnermut Naalakkersuisoq Karl-Kristian Kruse isumaqarpoq qaleralinniarnerup annikillinera akiorniarlugu aqutsisiniarsinnaanani uumasorsiuut naammattumik misissuisartinnagit
- Qaleralittassiinermi aalisartut uumasorsiuullu imminnut paaseqatigiissinnaanerusuuppata qaninnerullutillu soorlu raajarniarnermi taamaattoq, taava uumasiorsiuut annertuunik suliassaqassapput, Karl-Kristian Kruse, aviisimut Sermitsiamut oqarpoq.
Allannguisoqanngitsoq
2017-imi naliliinerup takutippaa aalisagaqassuseq allanngugaarsimanngitsoq taamaattumillu 2018-imut siunnersuutigineqarluni Qeqertarsuup tunuani 6.400 tonsiussasut, Uummannami 6.500 tonsit Upernavimmilu 6.300 tonsit.
– Uumasorsiuut inassutigaat Qeqertarsuup tunuani pisaassat 6.400 tonsiussasut Naalakkersuisut 9.200 tonsinik pisassiillutik. Tamatumani inuussutissarsiuteqartut (KNAPK) tusaaniarsimavarput taakku 10.000 tonsinik inassuteqaateqarlutik. Inassuteqaatit assigiinngitsut takutippaat illuatungeriit suleqatigiinnissaat qanoq pingaartigisoq. Siusinnerusukkut uumasorsiuut sapaatit akunnerani ataatsimi misissuisarput, ukiunili kingullerni sapaatit akunnerini marlunni misissuisalersimapput tamannalu aasaanerani pisarluni. Misissuinerit sinneri nalunaarsuiviit tunitsivinnilu paasissutissat najoqqutaralugit ingerlanneqartarput, isumaqarpugullu tamanna naammanngitsoq inassuteqaataasa malinnissaannut suleqatiginissaannullu, aalisarnermut naalakkersuisoq oqarpoq, nangillunilu:
Immikkoortoqarfimmik nutaamik siunnersuuteqartoq
- Uumasorsiuut sivisunerusumik aalisarfinniittariaqarput amerlanerusunillu misissuillutik assersuutigalugu immap kissassusaata allanngorneri aalisakkallu kissassuseq allanngoraangat qanoq pissusilersortarnersut. Ataatsimeeqatigigaangatsimik misissuinerit amerlanerunissaat Naalakkersuisunit piumasarisarparput qaleraleqassuserlu pillugu paasisaqarnerorusulluta, Karl-Kristian Kruse ilisimatitsivoq.
Pinngortitaleriffik Disko Bugtimi immikkoortortamik pilersitsinissaa Karl Krisian Krusep kissaatigaa, taamaalilluni ukioq naallugu misissuisoqartarniassammat.
Karl Kristian Krusep apersorneqarnera tamaat aviisimi Sermitsiami atuaruk, taanna uani ataani linki tooriarlugu isissutissarsiffigisinnaavat: