Kruse uppernarsaasoq: Henrik Fleischer Siumumi tikilluaqqusaavoq

Siumumi siulittaasup tulliata Karl-Kristian Krusep maanna uppernarsarpaa, Henrik Fleischerip Siumumi ilaasortaaqqilersinnaanera.

Peqatigitillugu oqaatigaa Henrik Fleischer anisitaanngisaannarnikuusoq.

- Karl Kristian Krusep tusagassiuutinut nalunaarutaa naapertorlugu Henrik Fleischerip Inatsisartuni gruppimit aninini pissutigalugu partiimit aninissani nammineq aalajangerpaa. Tamannalu Siumumut ilaasortat malittarisassatsinnut naapertuutinngilaq.

Henrik Fleischerip siusinnerusukkut nammineq oqaluttuaraa, Siumumi aqutsisunut allagaqarsimalluni 'paatsoorneqarsimasunik'. Karl-Kristian Krusep tusagassiorfinnut nalunaaruteqarnemini oqaatigaa, 'paatsoortoqarsimaneranut' pissutaasoq, Siumumi aqutsitu Fleischerip Inatsisartut gruppiannit anisutut paasisimammassuk.

Henrik Fleischeriå siusinnerusukkut tusagassiorfinnut nalunaaruteqarnermini nassuiaatigisimavaa, aqutsisunut allakkani utertissimallugit.

- Henrik Fleischerip nalunaarutigaa oqaaserisimasani utertillugit, siunissamilu partiimi ileqqoreqqussat malillugit suliniarluni, Kruse ilisimatitsivoq.

Siulittaasup tulliata Karl-Kristian Krusep paasisinnaanerarpaa, ilaannikkooriarluni aporaattoqarsinnaasarnera.

- Ilaanneeriarluni aporaattoqarsinnaasarpoq naalakkersuinikkullu sulinermi sakkortuuliortoqarsinnaasarluni. Taamaattariaqarpoq uummateqarfigalugumi suligatta.

- Henrik Fleischerip partiip siulersuisuunerit naalakkersuinikkut sulinermut tunngatillugu nassueruteqarpoq uteqqinnissanilu qinnutigalugu. Tamanna siulersuisuunernit tusaatissatut tiguarput akueralugulu .

Henrik Fleischer Sermitsiaq.AG-mut ilisimatitsivoq, Aalisarnermut Ataatsimiititaliami siulittaasutut ingerlaannarusulluni.