Skip to main content

Kruse piumasaqarpoq: Siumut politikkiminut sangoqqittariaqarpoq

Partii Siumut politikkerisami tungaanut sanguallaqqinnissaa, Siumumi siulittaasup tulliata Karl-Kristian Krusep pinngitsoornagu piumasaraa. Taama pisoqassanngippat, politikkimi suliunnaarnissani piareersimaffigaa.

Siumut iluani eqqissiviilliortoqaqqilerpoq. Karl-Kristian Krusemmi Naalakkersuisut politikkimi ingerlanerat pillugu isornartorsiuivoq.

Krusep Siumumi siuttut naalakkersuisoqataasut tusaajumannginnerat isummaminnillu allanngulersumik nikisitseriarsinnaannginnerat nukinnik atuiffigikatappaa.

- Taama isumaliutersuuteqarnikka piareersagaapput. Partii saamerliunerusumut, tassa politikkiminut, nikeriaqqinngippat qinersinermi uani politikkimik suliaqarnera qinigaaffimmi uani unitsissallugu piareersimavunga, partiimi siulittaasup tullia Siumumilu oqaaseqartartoq, Karl-Kristian Kruse oqarpoq.

Taanna, innuttaasut allat assigalugit, naalakkersuisut aqqummik toqqaasimanerannik qatsussivoq.

Taassuma ilisimatitsissutigaa allagaq ammasoq ataasinngornermi unnukkut avammut nalunaarutigineqannginnerani, Siumut iluani Siumumilu Inatsisartut gruppiannut nassiunneqaqqaarsimasoq. Qisuariartoqanngimmalli allakkat ammasunngorlugit avammut nassiunneqarsimasut.

Taassuma siuttut manngertisimaannarnerat tunuliaquttaminnullu tusaajumannginnerat qatsulluinnarpaa.

Siumup gruppiata ilaa piffissami kingullermi qalerallit pisassat amerlineqarnissaannut qilalugartassallu qernertat amerlineqarnissaannut piumasaqartarsimapput. Ilaatigut illuatungiliuttut piumasaqarnerminni atsioqatigisariaqarsimallugit. Pisassalli amerlineqassatinnagit, Karl-Kristian Krusep minnerpaamik piumasarigaluarpaa, pisassat amerlineqanngippata innuttaasut namminneq pilersorsinnaanerat unitsikkumanagu inuussutissarsiornermi suliniutinik nutaanik ujartuisoqassasoq.

- Naalakkersuisut manngertiinnartarnerat uagutsinnut peqqinnarnerpaatut isikkoqanngilaq. Maanna silaannaq peqqinnarunnaarpoq. Siulittaasorlu oqaloqatigiilluarsinnaavugut isumaqatigiinngikkaluarluta, oqaluuttaraluarlugilli nikeriarsinnaannginnerat tunngavilersuutigaara maannga killittariaqalerninnut, allaat sulininnik nalilersuisariaqalerlunga, oqarpoq.

Partiimut allamut nuunnianngilaq

Karl-Kristian Kruse Inatsisartunut qinersinermi kingullermi 322-nit taaneqarpoq.

- Partiimut allamut nuunnialersaarpit?

- Naamik taama eqqarsanngilanga. Qinersisartunit tunuliaqutserneqarlunga partiimi sulisussatut inissippunga, taakkulu salloqittassuakka partiimut allamut nuunniaruma, taamaaliortarneq nuannaartorinngilara. Qinersinerulli tullianut isumaliutigineqarsinnaavoq alla tunuliaqutaralugu sassarsinnaanissara. Maannakkulli Siumup ingerlanermini saqissanersoq takoqqaalaartigu, oqarpoq.

Siumumi ilaasortat ilaat ippassaq piumasaqarput Siumut siulersuisuuneri ataatsimiissasut, partiip sammivia tassani naqissuserneqassalluni. Ataatsimiittoqarnissaanulli suli ulluliisoqanngilaq.

- Siumup sammivia talerpiup tungaanut sangujartortoq allanngussanngippat, taava peqataaqqissinnaaneq isumaliutigiumaarpara, kisianni taamaatsillugu ajornarpoq, naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER