aalisarnermut inatsit
Kruse: Aarlerisaarutinit aqunneqarusunngilagut
Taarsiivigeqqussutit koruuninik milliardilikkuutaanik naleqarsinnaasut, siullermeerinnermi saqqummiissutissami, Karl-Kristian Krusep aalisarnermut inatsissamut atatillugu suliarisimasaani, Naalakkersuisut ernumassutiginngikkaat allassimavoq.
Aalisariutaatilissuit 2 milliard koruunit angullugit nalilinnik aalisariutinik piniarsimasut piffissamik killilersugaanngitsunik akuersissutit peerneqarniarnerat iluarisimaanngitsorujussuuvaat. Aalisariutaatillillu tamanna pinngitsaaliissummik taarsiissutitalimmik pigisanik piginnikkunnaarsitsinertut taavaat, taarsiivigeqquneqarnermillu kinguneqarsinnaavoq.
Isumaqataanngitsut
Taamatut naliliineq Naalakkersuisut isumaqataaffiginngilaat.
- Naalakkersuisut soorunami sianiginnissimapput, tassungalu atatillugu taamatut aarlerisaaruteqarnernik aqunneqarusunnginnertik oqaatigaat, Karl-Kristian Kruse siullermeerinninnermi saqqummiussissummi allappoq.
- Siunnersuutip matuma imarisaa, imaluunniit siunissami piffissamik killilersugaanngitsutut akuersissutinik utertitsinerit taarsiinissamik piumasaqaammik nassataqartussamik pinngitsaaliissummik pigisanik piginnikkunnaarsitsinerussaneri Naalakkersuisut isumaqatiginngilaat. Aalisarnermik annertuumik inatsisilersuisoqareernerasulli aalisarnermi inatsisilersuinissaminnut Inatsisartut siamasissumik attavissaqartuupput. Aalisartoqarnermi amerlanernik suliffissanik pilersitsisoqartillugu Inatsisartut aalisarnermik naleqqussaassappata, imaluunniit isumalluutit assannut amerlanernut Inatsisartut siammarterusussappatigit tamatumunnga periarfissaqarpoq, pinngitsaaliissummik pigisanik piginnikkunnaarsitsinermik, taarsiisoqarnissamik piumasaqaateqarfiusumik kinguneqartussaanngitsumik, Karl-Kristian Kruse allappoq.
Ilisimasallit inerniliussaat Krusep ilumuunnginnerarai
Karl-Kristian Kruse taama oqaaseqarnermigut, Naalakkersuisoqarfimmi Copenhagen Economicsimi immikkut ilisimasalinnut nalilersuititsisimanera taperserniarpasinngilaa.
- Naliliivugut taarsiiffigitinnissamik piumasaqaateqarsinnaaneq taamaalillunilu nunap karsiata aningaasartuutigilersinnaasai 2 mia. kr. tikillugit annertussuseqarsinnaasut. Taarsiiffigitinnissamik piumasaqaatit eqqortut taarsiiffigitinnissamik sulianut atatillugu naatsorsorneqassapput, Copenhagen Economicsip eqikkaanerani allassimavoq, siunnersuummullu ilanngunneqarsimalluni.
Krusep Inatsissatut siunnersuummi siullermi tusarniuutigineqarsimasumi ingerlatsisut akornanni oqallissaarutigineqarsimavoq. Kingunerisaanillu Sullissisut aamma KNAPK suleqatigiilerput.
Isertitassarpassuit annaaneqassasut
Aalisarnermut inatsissami aningaasat ukiumut isertitarineqartartut 180 million koruunit annaaneqaratarsinnaapput pisortaqarfinnilu isertitarineqartut 130 million koruunit annaaneqassallutik.
Taamaakkaluartoq Karl-Kristian Kruse allappoq, "kinguppannik aalisarnermi annertusisamik unammillertoqarnera naammassisaqarsinnaassutsimi pitsanngorsaatinik, nunap piffissamut ungasissumut unammillersinnaassusaanik nukittorsaasinnaasunik nassataqarsinnaanera ilimanaateqarsinnaavoq"