ilisimatusarneq

Kristumiuuvugut aliortukkanillu upperisaqartuulluta

Naak kalaallit 98 procentiisa missaat kristumiutut imminnut isigisaraluartut, kalaallit affaasa aliortukkat aamma upperaat. Aliortukkanik upperisaqarneq qanga angakkussartoqartaneranit sinneruttuusinnaavoq

Naak kalaallit 98 procentiisa missaat kristumiutut imminnut isigisaraluartut, kalaallit affaasa aliortukkat aamma upperaat

Nunatsinni maani aliortortoqartarpoq. Tarnerit ajortut illunut isertut, qivittullu tuluganngortut.

Videnskab.dk-mi allaaserisaq naapertorlugu aliortukkanik upperisaqarneq Nunatsinni takussaavoq, naak innuttaasut tamangajammik ilagiinnut ilaasortaagaluartut.

- Kalaallit amerlasuutigut qallunaanit kristumiuunerupput. Naalagiarnerusarput, nerliiviliartarnerlu pingaartinneqarnerusarpoq, Ilisimatusarfimmi lektori aamma Nuummi palasi, Minna Winsløv, oqarpoq.

- Kisianni kalaallit amerlanerpaartaasa aamma aliortukkat upperaat. Amerlasuut aliortukkanik takunikuupput, imaluuniit aliortornikunik nalunngisaqarput. Takussaasorujussuuvoq, taanna nangippoq.

Kalaallit innuttaasut 98,5 procentiisa missaat kristumiutut imminnut isigipput, tamanna Ilisimatusarfimmi ilisimatuutut 00-ikkut aallartinnerani misissuinerisa takutippaa.

Taassuma saniatigut, taakku affaasa missaasa anersaat aamma aliortukkat upperigaat misissuinerup takutippaa.

Videnskab.dk-mi atuaqqigit: Hver femte dansker kan have oplevet et ’spøgelse'

Anersaat kristumiuussusermut tulluanngillat
Aliortukkanik upperisaqarnerup Jesus Kristusimullu upperisaqarnerup ingiaqatigiinnerat, Minna Winsløvip ulluinnarni misigisarpaa.

Taanna ilagiinni palaseqatinilu assersuutigalugu ilaatigut aperineqartarput, iunit illuinit anersaanik peersitsisinnaanersut.

- Naaggaartarpunga, tassami anersaanik upperisaqarneq kristumiuussutsip illuatungerimmagu. Makeqqinneq upperaara, anersaaqarneralu upperinngilara, Minna Winsløv oqarpoq, nangipporlu:

- Oqaluffiup aliortukkanik upperisaqarneq akuersaanngilaa. Ajoqersuinikkut aamma evangeliap tuppallersaaneratigut, piffissap ingerlanerani tammarumaartoq naatsorsuutigaarput.

Videnskab.dk-mi atuaqqigit: Hjerneforskning afslører: Derfor 'spøger' det, når du er alene

Upperisat akulerussuunneqarnerat pissusissamisoorpoq
Minna Winsløvip naak aliortukkanik upperisaqarneq kristumiuussutsimut tulluarsorinngikkaluaraa, kalaallit ‘kukkusumik’ kristumiuunerannik isumaqarani naqissusiivoq:

- Inuit ilaat allanik akulerussuussilaartarput, kisianni tamanna pissutigalugu Jesus Kristusi annaassisutut upperinngikkaat oqartoqarsinnaanngilaq. Amerlasuut ileqqutoqqat qanga upperisamut isumaqarsimasut, ullumikkut upperisamut ilanngutinngikkaluarlutgit atortartarpaat, Minna Winsløv oqarpoq.

- Eqqaamaneqartariaqarpoq kristumiuussuseq maani suli nutaajuvoq, kuisimanngitsoq kingulleq aatsaat 1934-imi kuisippoq. Nutaajungaarmat qangarnisat peersimanerat naatsorsuutigineqarsinnaanngilaq. Akuleriisitsilaarnissaq pissusissamisoorpoq, nangilluni oqarpoq, aliortukkanik upperisaqarneq pinngortitamik upperisaqarneq Nunatsinni siammasissimaqisuminngaanneersinnaanera ilimanarluinnarnerarpaa.

Powered by Labrador CMS