Aleqap atornerluinera

Kristian Jeremiassenip pisattani poortorpai

Siumut sinnerlugu Inatsisartuni ilaasortap, Kristian Jeremiassenip, upperinngilaa Siumut pisumi uani aniguisinnaasoq. Taamaammat allaffimini pigisani poortorlugit aallartippoq

- Politikkikkut uteriaqqissinnaajunnaarpugut, Kristian Jeremiassen pigisaminik poortuiutigaluni oqarpoq

Inatsisartut kukkunersiuinermut ataatsimiisitaliaani siulittaasoq, Kristian Jeremiassen, tallimanngormat unnukkut tusagassiuutinut nalunaarummik nassiussivoq Naalakkersuisut siulittaasuat nunatta karsianik aningaasanik nammineq inuttut atugassaminik atuisarsimasoq.

- Politikkikkut uteriaqqissinnaajunnaarpugut. Atassut ersarissumik nalunaaruteqarpoq qinersinissamik piumasaqarluni. Aamma illuatungiliuttut tamarmik Siumumik naalakkersuisooqateqarniarnatik nalunaarput. Taamaammat allaffinni poortuillunga aallartippunga, Krisitian Jeremiassen, Inatsisartunut qinigassanngortinniarani siusinnerusukkut nalunaaruteqareernikoq oqarpoq.

Atuaruk: Naalakkersuisut uppisinneqarsinnaanngorput

Kristian Jeremiassenip partiimini siulittaasup nunatta karsianik atornerluisimanera pillugu tallimanngormat unnukkut tusagassiuutinut nalunaaruteqarpoq Inatsisartut kukkunersiuinermut siulittaasuattut. Suliallu Naalakkersuisuni ilaasortanik sisamanik tunuartitsinissaa ilimagisimanngikkaluarpaa.

- Soorunami suliap Naalakkersuisunik taama amerlatigisunik tunuassutigineqarnissaa ilimagisimanngikkaluarpara. Ilimagisimagaluarpara arlaatigut aaqqiissutissamik nassaartoqarumaartoq. Kisianni tassa taama pisoqanngilaq, Kristian Jeremiassen allaffimmini poortuiutigaluni taama oqarpoq.

- Atortukka poortorpakka. Aamma meeqqat pinnguaat. Pinngussat meeqqama ukiaanerani ataatsimiinnermi tikeraaraminnga pinnguarisartagaat. Pinngussat taakkua massakkut ukioq kaajallallugu pinnguarisinnaalissavaat. Qilanaaqaallu, Kristian Jeremiassen Sermitsiaq.AG-mut oqarpoq.

Atuaruk: Lars-Emil: Paatsiveerusimaartoqarpoq

Aleqa Hammondip 106.363,27 koruuninik nunatta karsianit ukiup ataatsip ingerlanerani atornerluisimanerata kukkunersiuinermik ataatsimiisitaliamit misissuiffigineqarnera, Siumut sinnerlugu Naalakkersuisunut ilaasortat marluk, Nick Nielsen aamma Jens-Erik Kirkegaardip, kiisalu Atassut sinnerlugu Steen Lyngep aamma Siverth K. Heilmannip Naalakkersuisunit tunuarnerannik kinguneqarpoq. Taakkuami Aleqa Hammondip iliuusai illersorsinnaanagit tunuarmata.

Pingasunngornermi nalunaaqutaq 16.03 Siumut nalunaaruteqarpoq Aleqa Hammond Siumumi siulittaasutut tunuartoq.

Siumumi maanna siulittaasuungallarpoq Jørgen Wæver Johansen, Kim Kielsen Naalakkersuisunut siulittaasuungallartoq.

Aleqa Hammondip pisortat aningaasaataannik atornerluineranut allaaserisat allat uani atuakkit

Powered by Labrador CMS