Kristian Jeremiassen: Attu atuarfittaartariaqaraluarpoq
Attumi atuarfik immap ulerujussuarneranik eqqugaavoq, imarmi atuarfiup kælderia angusimavaa. Attumi atuarfiup nutaamik taarserneqarnissaanut Namminersorlutik Oqartussaniit tamakkiisumik aningaasaliisoqarnissaa Inuit Ataqatigiit sinnerlugit Inatsisartuni ilaasortap maanna noqqaassutigaa.
Sapaatip akunnerata naanerani sakkortuumik Nunatta kitaani anorersuarpoq, tamannalu Attumi innuttaasunit arajutsineqanngilaq. Attumi ulerujussuup atuarfik pisiniarfillu anguai, tamannalu politikerimit qisuariarfigineqarpoq.
Inatsisartuni ilaasortaq Kristian Jeremiassen (IA) paragraf 37 naapertorlugu Naalakkersuisunut apeqquteqarpoq. Taannami isumaqarpoq Namminersorlutik Oqartussat Attumi atuarfimmik nutaamik tamakkiisumik aningaasaliisariaqartoq.
- Taamatut aperininni atuarfiup peqqinnarunnaavissimanera pissutigivara. Tassa ulinnerup angusarmanga atuarfiullu kælderia immattarpoq ulinneranik. Kommune Qeqertalik kisimi atuarfimmut aningaasaliissanguni ajornarpoq, taama ilaatigut politikeri apeqquteqarnermini tunngavilersuivoq nangillunilu:
- Una Attumi atuarfik pinngortitap nukingisa kingorna ulinnerup angusalermangu atuarfimmi isugutak, niaqorlunneq, anernilunneq, qasuneq ilaalu ilanngullugit atorneqartarput Attumi atuarfimmiissimatilluni sivisuumillu isersimagaanni inuunilunnarsisarluni, Kristian Jeremiassen allappoq.
Anorersuaq ulerujussuartitsisoq
Attumi innuttaasut 200-t missaaniipput. Innuttaasullu ajornerusumik pisoqannginnera iluatitsiffigaat. DMI-mi naapertorlugu kujataani anorersuaq nunatta kitaanut ulerujussuartitsivoq. Siullermilli Attumi ulerujussuartoqanngilaq, ulerujussuartoqartillugulu atuarfik tikinneqartuassaaq.
Atuarfimmi ulerujussuarnik tikinneqartartumi qanoq sivisutigisumik meeqqat atuarfimmiitsinneqartassanersut Inuit Ataqatigiillu sinnerlugit Inatsisartuni ilaasortap aamma paaserusuppaa:
- Attumi atuarfik nutaamik taarserneqarnissaa Namminersorlutik Oqartussat tamakkiisumik aningaasaliinissamik pilersaaruteqarpat? Attumi atuarfiup ulinnerup angusarpaa qanoq sivisutigisumik suli atuartut taamaattumik atuarfeqartinneqassappat, Kristian Jeremiassen (IA) apeqquteqarpoq.