Pituffik
Kristian Jensenip qineqqusaarutaasoq malinngikkaa
Pituffimmi kiffartuussinissamut isumaqatiginninniarnermi misissuisoqannginnissaa nunanut allanut tunngasunut ministeri oqarpoq
Danmarkimi Kalaallit Nunaannilu politikkikkut atorfilittat Pituffimmi kiffartuussinissamut isumaqatiginninniarnerminnut tunngatillugu misissuiffigineqassanngillat.
Kiffartuussinissamut isumaqatigiissummut isumaqatiginninniarnerit kikkunnut tamanut ammatinneqartariaqanngitsut nunanut allanut ministeri, Kristian Jensen, Venstre, oqarpoq.
- Naalakkersuisuusimasunik isornartuinianngilanga, Sermitsiaq.AG-mut oqarpoq.
Misissuisoqassanngilaq
- Inuit peqataasinnaanngitsut misissuiffigineqartariaqanngillat.
Danmarkip suliamut aamma misissuiffigineqarnissaa pingaaruteqarunnaartoq oqaatigaa, U.S. Court of Federal Claimsimmi isumaqatigiissutaasoq atortussaanngitsutut aalajangiutereerpaa.
- Siumut isigisoqartariaqalerpoq. Isumaqatigiissutaasormi atortussaatinneqanngolaq. Siornatigut suliarineqarsimasut taamaasilluni kingumut misissorneqartariaqarunnaarput, Kristian Jensen oqarpoq.
Pappilissat paasissutissanik imallit
Kalaallit Nunaata, Danmarkip USA-llu illersornissamut isumaqatigiissutaat naapertorlugu ingerlatsisoqarnissaa nunanut allanut ministeriusup pingaartinneruaa.
AG-p KNR-illu pappilissanik paasissutissanik imalinnik qinnuteqareerneranni paasineqareerpoq Danmarkimi Nunanut Allanut Ministeriaqarfik kiisalu Namminersorlutik Oqartussat siuliani isumaqatigiissummut suliaqarsimasut, suliartillu ilisimasimagaat aamma paasinarluni.
Pituffik pillugu qineqqusaarut
Paasisat naapertorlugit misissuisoqarnissaa Inatsisartunit Folketingimiillu ilaasortaasunit piumasarineqarnikuugaluarpoq.
Kristian Jensenip parteeqataa Troels Lund Poulsen misissueqqusinermut ilaatigut peqataagaluarpoq.
- Soorunami qinigaareernitta kingorna una suliaq misissussavarput. Soorunami suliaq ilungersunartuuvoq misissorneqarluartariaqarlunilu, Kristian Jensen KNR-imut maajimi oqarpoq.
- Naalagaaffeqatigiinnermi isumaqatigiissutaasut naapertuullugit ingerlatsisoqannginnera soorunami akuerineqarsinnaanngilaq, maajimi oqarpoq.
Piumasaqaatigiunnaarpaa
Qineqqusaarnermi kiisalu parteeqataata oqaasii taamaasilluni uniorlugit maannakkut oqariartuuteqarpoq. Paasissutissanik allanik saqqummertoqaqqinnissaa aamma naatsorsuutigineqassanngilaq.
- Isumaqataasoq atuutsinneqanngilaq, aatsaallu ingerlanneqaqqittussanngorluni. Maannakkumit siunissamut isigilerpugut, Kristian Jensen Sermitsiaq.AG-mut oqarpoq.
- Danmarkimi Kalaallit Nunaannilu naalakkersuinikkut ingerlatsisut iliuuserisimasaat puiguinnarneqannginnissaat anguniarpiuk?
- Arlaannik puigugaqassanngilagut. Pisoq ilinniutaassaaq. Pisimasut nukissanik atuiffigivallaarigut isumaqarpunga, maannakkummi sulinitsinnut akornutaasinnaavoq.