Kristian Jensen: Kerryp nassuerutigaa USA akisussaaffeqartoq

Thulemi sakkutooqarfimmi kiffartuussinissamik isumaqatigiissut, 2013-imi Kalaallit Nunaannut annaasaateqaataasumik uggornaqisumillu amerikarmiunit tiguneqarnera kingorna ukiuni arlalinni aaqqiagiinngissutaareersoq, Kalaallit Nunaat Danmarkilu isumalluarnarpasissumik ilalerneqarput.

Aaqqiagiinngissut tamanna pillugu nunanut allanut ministerip Kristian Jensenip (V), amerikarmiut nunanut allanut tunngasunut ministeriat John Kerry, nunatsinnilu naalakkersuisut siulittaasuat Kim Kielsen (S) , tallimanngormat oqaloqatigai.

– Amerikarmiunit ersarissumik oqaatigineqarpoq pisussaaffitsik ilisimagitsik. Tamannalu qanoq isiorlutik arlaatigut naammassisinnaassallugu, Kristian Jensen Iluissani ataatsimeereernerup kingorna oqarpoq.

Kristian Jensen naapertorlugu pisussaaffimmi pineqartumi pineqarpoq "isumaqatigiissutip siunertaa", tassalu imaappoq, "isumaqatigiissut Kalaallit Nunaannut akileraarutitigut isertitaqarfiussasoq, suliffinnik pilersitsissasoq ilinniagaqartitsinissamullu periarfissiissasoq".

Thulemi sakkutooqarfimmi kiffartuussinissamik isumaqatigiissutip tunniunneqartarnera, 2013-ip tungaanut Danmarkip isumagisarsimavaa.

EU-p unammillernermut malittarisassaanik Danmarkip ajornartorsiuteqalersinnaanera pissutigalugu suliassaq tamanna amerikarmiunut tunniunneqarpoq. Tamatuma kingorna isumaqatigiissutip suliarinnittussarsiuunneqarnerani amerikarmiut selskabiat nammineersinnaanngitsoq, tunuliaqutalilli. ajugaavoq.

Kiffartuussinissamik isumaqatigiissutip aaqqiagiinngissutigineqarnera maanna amerikarmiut eqqartuussivianni suliarinneqarpoq.

– Isumaqatigiissummut apeqqutaasoq ingerlateqqikkuminaappoq, pissutigalugu eqqartuussiviit Danmarkimi USA-milu arlaannaannulluunniit attuumassuteqanngimmata. Ersarissumilli paasitinneqarpugut USA-p akisussaaffeqarnini nassuerutigigaa, tamassumalu malinneqarnissaanut amerikarmiut piareersimasut, Kristian Jensen oqarpoq.

Qallunaat nunanut allanut tunngasunut ministeriata ataatsimiinnissaq sioqqullugu nalunaarutigisimavaa isumaqatigiissutip oqaluuserinissaanut piareersimalluni, tamanna Kalaallit Nunaata saqqummiutissappagu.

Nunattalu naalakkersuisuisa tamanna piareersimaffigaat.

– Thulemi sakkutooqarfimmut apeqqutip aaqqinneqarnissaanut kalaallit soqutigisarinerpaasaat tassaavoq, isumaqatigiissut kalaallinut inuiaqatigiinnut iluaqutaassasoq nuannaarutaallunilu. Pingaartipparput taanna Kalaallit Nunaannut sapinngisamik pitsaanerpaamik sunniuteqassasoq, Kim Kielsen oqarpoq.

Amerikarmiut nunanut allanut ministeriata, Kielsen Jensenilu peqatigalugit tallimanngormat Ilulissat Kangerluannut angallammik takornariartup, tamanna oqaaseqarfigiumanngilaa.

Kerryp Kalaallit Nunaanniinnermini tusagassiortut kalaallit qalllunaalluunniit oqaloqatigiumanngilai.

/ritzau/