tapiissutit
Krarup: Qinnuteqaat qanorluunniit itigartinneqarsimassagaluarpoq
Tusagassiivik Sermitsiaq.AG-mi pisortaasup Poul Krarupip qinnuteqaatip kingusinaarlugu nassiunneqarneranut akisussaasuulluni oqarpoq. Qinnuteqaalli susoqaraluarpalluunniit itigartinneqassasoq naatsorsuutigisimallugu oqarpoq
Naalakkersuisut Siulittaasuata Naalakkersuisoqarfiata pingasunngormat nalunaarutigaa Tusagassiivik Sermitsiaq.AG tapiiffigineqarnissamik qinnuteqaataa itigartinneqarsimasoq, tassungalu tunngaviusut marluupput: Aningaasatigut ingerlalluarnera pissutaalluni itigartitsisoqarpoq kiisalu aamma qinnuteqaat kingusinaarluni nassiunneqarsimanera tunngavilersuutigineqarluni.
Naalakkersuisut itigartitsinerminnut tunngavilersuutaat allagaq juulip qulingiluaanni 2014-mi nassiunneqarpoq. Tassani ilaatigut oqaatigineqarpoq qinnuteqarfissap killigititaa januaarip arfineq pingajuaasoq qaangerlugu qinnuteqartoqarsimasoq. Qinnuteqaat februaarip aqqarnganni tiguneqarsimasoq nalunaarutigineqarpoq.
- Tusagassiivik Sermitsiaq.AG-mi pisortaq Poul Krarup, qinnuteqarfiup killigititaa qaangerlugu qinnuteqaammut Naalakkersuisut ilaatigut itigartitsisoqarnera qanoq oqaaseqarfigisinnaaviuk?
- Namminersorlutik Oqartussani qinnuteqaat suliarineqarnera tupigusuutigaara. Sooruna qinnuteqaaterput itigartinneqanngila ingerlaannaq oqarluni qinnuteqaat piffissaliussaasoq qaangerlugu qinnuteqartoqarsimaneranik? Februaarip aqqarnganni nassiussarput itigartinneqanngilaq kingusinaarluni nassiussimanera pissutaalluni. Qinnuteqaatip suliarineqarnera tassanngaannit aallartippoq - kingusinaarluni qinnuteqaateqartoqarsimanera tassani suliarineqanngilaq. Qinnuteqaatitsinni aningaasaqarnerput qitiusumik maluginiarneqarpoq. Kingusinaarluni qinnuteqaateqartoqarsimaneranik ataasiaannarluunniit taaneqanngilaq. Ataatsimiigiaqquneqarpugut, tassanilu aningaasaqarnerput sammivarput. Aningaasaqarnitta inissisimanera pissutaalluni itigartitsisoqarnera naatsorsuutigilluinnarpara. Qinnuteqaaterput qanoq ingerlanneqarnersoq maajimi Namminersorlutik Oqartussanut nalunaaruteqaratta oqarfigineqarpugut juulimi akissuteqartoqassasoq. Kingusinaarluni qinnuteqaateqartoqarsimanera pissutaalluni itigartitsisoqassappat aatsaat juulimi tamanna nalunaarutigisariaqanngilaq, Poul Krarup oqarpoq.
Akisussaaffigalugu oqaatigaa
- Qinnuteqaatip itigartinneqarnissaa attaveqatigiittarnitsinni oqaatigineqanngilaq. Qinnuteqaaterput annertuumik suliarineqarpoq. Qinnuteqaatit annertuumik suliarineqarneq ajorput qinnuteqaatit kingusinaarlutik nassinneqarsimagaangata.
- Soormita kingusinaarluni qinnuteqaateqartoqarpa?
- Januarimi qinnuteqaatip nassiunneqannginnera uanga akisussaaffigaara. Tamanna uagutsinnit kukkuneruvoq. Qinnuteqaaterput itigartinneqarpoq aningaasatigut ingerlalluarpallaarnitta pissutigisaanik, Poul Krarup oqarpoq.
IA isornartorsiuisoq
Naalakkersuisut itigartitsinerminnut tunngavilersuutigaat Inuussutissarsiornermik Aningaasaateqarfik Sermitsiaq.AG tapiissutit ilanngunnagit siorna 5,7 millioner koruuninik sinneqartooruteqarsimammat - tapiissutit ilanngullugit sinneqartoorutit 11,2 millioner koruuniusimallutik.
Aamma qinnuteqaatip kingusinaartumik nassiunneqarsimanera pissutaalluni itigartitsinermut tunngavilersuutigineqarpoq.
Nuna tamakkerlugu aviisinik marlunnik sapaatip akunneranut saqqummersitsisartoq Naalakkersuisut tapiinissaminnut itigartitsipput. Tamanna pillugu Inatsisartuni ilaasortaq Naaja Nathanielsen paragraf 37-mik Naalakkersuisunut apeqquteqarpoq.