Kræftimut pilersaarut ukiup affaanik kinguaattoorfiusoq
Naalakkersuisut 2019-imi upernaakkut ataatsimiinnermi peqquneqarput, immikkut ittumik kræftimut pilersaarummik ukioq manna upernaakkut ataatsimiinnermi saqqummiussissasut. Tamaanili pisimanngilaq, suliassallu naatsorsuutigeqqaarneqartumit annertunerunera paasinarsisimalluni.
Peqqissutsimut Naalakkersuisup Anna Wangenheimip paragraf 37 naapertorlugu IA-meersup Sofia Geislerip apeqqutaanut akissuteqarnermini ilisimatitsissutigaa, kræftimut pilersaarut ukiakkut ataatsimiinnermi aatsaat saqqummiunneqarsinnaasoq.
Naalakkersuisut peqquneqarsimapput, kræftimik nappaateqarnerup paasineqarnerata kingorna ullut 28-t qaangiutsinnagit kræfteqartut katsorsarneqarnissamut pilersaarusiuunneqartarnissaannut periarfissanik misissuissasut. Aamma kræftimik eqqugaasimalluni paasineqarnermiit sivisunerpaamik ullut 30-t qaangiutsinnaagit katsorsarneqarnissamut neqerooruteqartoqarsinnaaneranik misissuisssasut.
Kinguuaattoornermut nassuiaat
- Kræftimut suliassaqarfimmi katsorsarneqarnerup aallartereersimasarnissaanik qularnaarisoqartalernissaanut misissueqqissaarinissaq pillugu apeqqutip akineqarnissaani ilaatigut Kræftimut pilersaarutip nalilersorneranit paasissutissat angusallu apeqqutaapput. Paasissutissanik attuumassuteqartunik naliliilluni sulissutiginnillunilu suliaq naatsorsuutigeqqaarneqartunit annertuneruvoq. COVID-19-ip nassatarisaanik nukissanik atuineq tunngavigalugu tamatuma kinguneraa kræftimut pilersaarutip nalilersorneqarnera kingusinaarmat, Anna Wangenheim akissuteqaammini allappoq.
- Katsorsarneqarnerup aallartereersimasarnissaanik qularnaarisoqartalernissaanut pillugu apeqqutinut akissutit kingusinnerpaamik Inatsisartut 2020-mi Ukiakkut ataatsimiinneranni piareersimanissaat naatsorsuutigineqarpoq, Peqqissutsimut Naalakkersuisoq neriorsuivoq.