Kræftertunik misissuineq nakorsallu ikippallaarnerat: Qanoq iliortoqassava

Nunaqarfiit nakorsaqarniarnerisa pitsanngoriarnissaannut Naalakkersuisut qanoq iliuuseqarnersut Jens Napaattooq paasisaqarusuppoq. Taamaammallu tamanna pillugu paragraf 37 naapertorlugu apeqquteqarpoq.

MR-scannerimik pisiniarluni suliaq aallartinneqarpoq.

Naleqqamit politikeri Jens Napaattooq allarpassuit assigalugit, innuttaasut kræfteqartillutik kingusinaarlutik misissorneqartarnerannik ernumassuteqarpoq.

- Nunaqarfinniit nakorsiarnertarneq ajornartorujussuuvoq, allaat peruluuteqarlutik takussutissaqartut saaffiginnittaarujussuaqqaarlutik aatsaat nakorsiarsinnaasarlutik, taanna apeqqumminut tunngavilersuummini taama allappoq.

Nunaqarfinnit nakorsamut attaveqarniarneq ajornannginnerusariaqartoq, Naleqqap oqariartuutigaa.

- Avannaanni nakorsat ikippallaarujussuarput kisitsisit kingulliit saqqummersut aallaavigalugit Upernavik qiviaraanni nakorsat sisamaasimasussaagaluartut kisitsisit tikkuuppaat, taamaammat nakorsat amerlineqarnissaat pisariaqarluinnartutut inissisimaffiuvoq, nalunngilarpummi Upernavik assersuutigigaanni nunaqarfikkaajunerpaasoq aammalu inuttusiartortumik allaat illoqarfimmik taaneqartartumik amerlanerusunik nunaqarfiit ilaat inuttutigilerlutik inissimaannaratik amerliartortut.

Ajornartorsiut nutaarsiassartaqanngitsoq

2019-imili peqqissutsimut naalakkersuisuusimasup Martha Abelsenip, nunaqarfimmi peqqinnissaqarfimmi sulisutuat sulinngiffeqaraangata, nunaqarfinni peqqissaaveqarfiit matoqqasariaqarnerat ernumassutiginerarpaa.

- Naalakkersuisut ilisimatitsissutigisinnaavaat, maannakkut Peqqinnissaqarfik qarasaasiakkut nakorsiartitsinermi aaqqiissuteqarnernik nutaanik ineriartortitsinermik ingerlataqarmat, ilaatigut app videokkut nakorsiarnermik tamatumani ilaavoq.

Ungasianiit nakorsiartitsineq misilerarneqartoq

Maannakkut video aqqutigalugu nakorsiartitsinernut aaqqiissut nutaaq lnuunerissaavik Steno Diabetesimit misilittarneqarpoq, app ukiup tulliani nuna tamakkerlugu atuutilersinneqarnissaa naatsorsuutigineqarpoq.

Tamatuma saniatigut Ukiakkut lnatsisartut ataatsimiinneranni nakorsanik amigaateqarneq pillugu kiisalu peqqissaavinni avinngarusimasuni sulisunik amigaateqarneq pillugu nassuiaammik Naalakkersuisut suliaqassasut akuersissutigineqarpoq.

- Nassuiaat Peqqinnissaq pillugu ataatsimiititaliarsuup isumaliutissiissutaanut, ukiup tulliani tamanut saqqummiunneqartussamut tapertaasinnaasoq naatsorsuutigineqarpoq.

Kræftertut siusinnerusukkut misissorneqartalernissaannut katsorsarneqartalernissaannullu qulakkeerinninniarluni qanoq iliortoqassanersoq, Jens Napaattooq aamma paasiniaavoq.

- Naalakkersuisut ilisimatitsissutigisinnaavaat immikkut ilisimasallit angalasartoqatigiit inalugarsuarmik erlummillu qinnguartaammik misissuinnermik (koloskopi) suliaqartut pillugit suliniutitut pilersaarut nunap immikkoortuini napparsimavinni suli ingerlammat.

Atortunik pisinerup pissutsit pitsaanerulersissinnaagai

Suliniutitut pilersaarut siusinnerusukkut suussusersiinermut taamaalillunilu katsorsaanerup siusinnerusukkut aallartinneqarneranut qulakkeerinneqataavoq.

- Atortussat pisiarineqarput, taamaattumik Qaqortumi, Sisimiuni, Aasianni llulissanilu maannakkut misissuinerit suliarineqarsinnaapput.

2022-mi illoqarfiit tamarmik immikkut ilisimasalinnit atortunik nassartunik tikeraarneqarsimapput, suliassatullu pilersaarut 2023-mi ingerlaqqissaaq.

Peqatigitillugu Dronning lngridip Napparsimavissuanut MR-scannerimik nutaamik pisiniarnermik suliamik ingerlatsineq Peqqinnissaqarfiup aallartissimagaa, Naalakkersuisut ilisimatitsipput.

- Peqqinnissaqarfimmut MR-scannerimik nutaamik pisineq kræftimik nakkutilliilluni misissuinermut aamma nappaammik suusorsiortaatsimut pitsaanerulerseqataassaaq, tamanna pillugu nappaatit siusinnersukkut paasineqarsinnaassapput.

Powered by Labrador CMS