Kræfteqartoq ilaginnarneqarsimasoq: - Piffissaq apeqqutaaginnarpoq toqukkut qimagunnissannut

Kalaallit Nunaanni Peqqinnissaqarfimmit kræftertut Danmarkimi misileraammik katsorsarneqarnerannut akiliuteqarnissaq akueriumaneqanngilaq. Kræftimik nappaateqartup Naaja Zeeb Pedersenip tamanna aalassassutigaa, erninilu aqqaneq-marlunnik ukiulik qanoq oqaluttuutissanerlugu nalullugu.

Tuparujussuarpunga annilaangalerlungalu. Eqqarsarpunga angerlarlunga utaqqiinnalissallunga... Piffissaq apeqqutaaginnarpoq toqukkut qimagunnissannut, Naja Zeeb Pedersen oqarpoq.

Sapaatip-akunnerata ataatsip matuma siornatigut taamatut nalunaarfigineqarpoq.

Naja Zeeb Pedersen 44-nik ukiulik taamatut nalunaarfigineqarami tuparujussuarsimavoq -sulilu tupaqqalluni.

Kalaallit Nunaanni Peqqinnissaqarfimmit misiliummik katsorsaanissamut akiliuteqarusuttoqanngimmat ilaginnagaasutut misigisimavoq. Kræftip timaanik arriitsumik nungutitsiartorneranik qaangiinissamut tamatuma neriuutaarutsissimavaa.

Naja Zeeb Pedersen assut anniarluni januaarip 15-iani Nuummi Sanap peruluttunut immikkoortortaqarfiani uninngasimavoq. Scannertikkami toqussutaasinnaasumik nappaateqarluni paasivaa. Qaammat ataaseq qaangiummat Danmarkiliartinneqarpoq, Københavnimilu Rigshospiltalimi katsorsartinnera aallartinneqarluni.

Naja Zeeb Pedersen kræfteqarluni paasitinneqarsimavoq - ataasiinnaanngitsumik timaanili assigiinngitsutigut kræfteqalersimalluni. Tartumigut, tingummigut, puammigut, qungatsimigut, siffissamigut qimerlumigullu pingasunik kræfteqarluni paasitinneqarsimavoq. Timaani tinumasoqarsimavoq kræftimik siammarterisumik, nakorsallli tinumasoq nassaarisinnaasimanngilaat: Nakorsat oqartarnerattut tinumasoq ilisimaneqanngitsoq.

Annassutaasinnaasumik neriuuteqalersinneqartoq

Naja Zeeb Pedersen Rigshospitalimi qinnguartartilluni katsorsarneqalersimavoq. Sapaatip-akunnerisa marluk ingerlaneranni quleriarluni qinnguartartittarsimavoq, sunniuteqanngitsunilli. Kræftia minnerulersimanngilaq. Naja Zeeb Pedersen taamaammat marloriarluni kemortissimavoq, tamannali aamma kemortereernerup kingorna immunterapimik katsorsartinnera iluaqutaasimanngillat.

Naja Zeeb Pedersen aporfissaqarsimaqaaq inuuvorli nukittooq. Rigshospitalimi nakorsaata katsorsaariaatsimut nutaamut ingerlaannartumik innersuussimavaa, misileraataasumik katsorsaaneq tinuneranik sumiissusersisinnaasoq, nappaataanik nakorsat katsorsaasinnaanngorlugit.

- Piffissamik inniminniissaagut, nakorsaq piaarnerpaamik katsorsaasoqarnissaanik qulakkeerinnikkusussimasoq Naja Zeeb Pedersenimut oqarsimavoq.

Neriuuteqalersimavoq, sivikikkaluamilli.

Aalajangiisimaneq attatiinnarneqartoq

Naja Zeeb Pedersenip katsorsarteqqinneqarnissaa anguniarlugu innersuussutaa pillugu Dronning Ingridip Napparsimmavissuani nakorsaaneq saaffiginnissimavoq.

"Allakkianni takusinnaavara, napparsimasoq (Naja Zeeb Pedersen) misiliutaasumik katsorsarneqarnissaanut innersuussimagit. Erseqqissaassutigisariaqarparali Kalaallit Nunaanni Peqqinnissaqarfik misiliutaasumik katsorsaanissamut aningaasaliissuteqarneq ajormat. Innersuussutit misissuisartut ataatsimiititaliaanni ilaasortanut oqaloqatigiissutigisimavara, taakkulu aalajangiisimaneq attatiinnarpaat. Allanik katsorsaatissaqanngippat, napparsimasoq anniarnaveersaatinik Nuummut katsorsartikkiartortariaqarpoq. Aalajangiisimaneq siunissamit napparsimalerumaartunut aamma atuutsiinnarneqarnissaa naatsorsuutigaara".

- Tuparujussuarpunga annilaangalerlungalu. Eqqarsarpunga angerlarlunga utaqqiinnalissallunga... Piffissaq apeqqutaaginnarpoq toqukkut qimagunnissannut.

Naja Zeeb Pedersenip nassuiatigaa, oqaloqatigiinneq oqimaassimasoq - aamma nakorsamut allatut iliuuseqaqqissinnaannginnerminnik nalunaaruteqartumut tamanna oqimaassimavoq.

Annikilliornartoq

Rune Zeeb Pedersenip Naaja Zeeb Pedersen ukiuni 16-ini nuliaraa. Ernertik aqqaneq-marlunnik ukiulik, Najap Danmarkimi katsorsarniarneqarnerani Nuummi paarisimavaa.

Naja Zeeb Pedersen sisamanngornermi Nuummut utersimavoq.

- Inooqatigisap taamatut atugaqarnera ajorluinnarpoq, Rune Zeeb Pedersen oqaasissani tamaasa anninnagit oqarpoq.

- Aapparma nalunngilaanga. Taassuma uannut tunngasut tamaasa nalunngilai, taanna oqarpoq, nipaatsiariarlunilu oqarluni.

- Tataannaqaaq.

Naja Zeeb Pedersenip aalajangiisimaneq kamaatigaa, pakatsissutigalugu aliasuutigalugulu.

- Erninnut qanoq oqassallunga naluara. Suli oqaluttuutinngilarput, Naja Zeeb Pedersen uiminut qiviarluni oqarpoq.

- Kræfteqartutit nalunngiaa, peqqinnissaqarfimmiilli taamaatitsiinnarsimaneq naluaa.

Powered by Labrador CMS