Kræft: 1200-ut Betina tapersersorpaat

Qaqutigoorpoq allaaserisat taama amerlatigisunit oqaaseqarfigineqarlutillu facebookimi ’like’rneqartarnerat. Tamanna pivoq Betina Kristiansen pillugu allaaserisaq Sermitsiaq.AG-mi juulip aallaqqaataani saqqummiunneqarmat.

Allaaserisami Kræftimik napparsimasoq: Uumarusuppunga!-mi Betina Kristiansen Ilulissaneersoq saqqummerpoq tupigusuutigalugu napparsimanermini naammaginartumik misissorneqartarsimannginnini. Ilanngullugu oqaluttuaraa iviagikkut kræftimik nappaanni maanna takkuteqqissimasoq.

Betina Kristiansen 36-nik ukiulik tapersorniarlugu suliniaqatigiit nalunaarput katersuiniarneq ullumi aallartittoq nakorsartinnissaanut atugassanik.

Facebookimi qupperneq ’Vi vil have Betina rask igen’ piffissap sivikitsup ingerlanerinnaani 1200-nik tapersersorteqalersimavoq peqqissinissaanik kissaateqartunik.

Isumassarsiaq facebook-imi qupperneq, nunatsinnilu katersuiniarnissaq pilersimavoq Betina-p ikinngutaasa Betina-p aappassaanik iviangimigut kræft-eqarlersimanerata paasineqarnerata kingorna. Arlaleriarluni kermoterapeertittareerluni, paasivaa nappaat siaruaassimasoq tinguanut puaanullu.

- Betina napparsimangaarami qularilersimavaa nunatsinni nakorsat inuunera annassinnaagaat, namminerlu aaliangerluni iliuuseqarniarsimavoq. Nittartakkatigut ujarlernermi paasisimavaa Universitethospital-imi Frankfurt-imi Tyskland-imiittumi, timip ilaanut taasagaannik kemoterapi-mik, nunatsinni Danmark-imilu nalinginnaasumik katsorsaanermik neqeroorfigineqarneq ajortumi, kisiannili katsorsaariaatsimik pitsaasumik Betina-p nappaataanut katsorsaalluarsinnaasunik. Nammineq akilerlugu katsorsartinneq akeqarsinnaavoq allaat 400.000-miit 500.000 kr pallillugit, taamaammat aaliangerpugut tapersersuilluta peqatigiiffiliorniarluta, katersuiniarniarlutalu Betina ilaqutaalu ikiorniarlugit, aallarniisut ilaat, Naja Habermann tusagassiutinut nalunaarummi oqarpoq.

Suliarineqarsinnaavorooq
Betina sapaatip akunnera naasoq katsorsarneqarnissaminut naleqquttutut nalunaarutigineqarpoq Frankfurt-imiit, pingasunngornermilu Tyskland-imut aallassalluni. Nakorsarisaasa ilisimavaat pilersaarutai, paasisinnaallugulu Tyskland-imi katsorsatsinnissaminut kissaataa, Rigshospital-imiillu nakorsanit malinnaavigineqarluni.

- Soqutigineqarluarnera annertungaarmat, quppernermi ilanngukkusullutik qinnuteqartut amerlangaarmata akuerinissaannut angumersiniaarsuaarpugut, taavalu ajunngisaarneq annertooq nalaallutigu, ileqqussaq allaffissornikkut aaliangiussimasaq. Nuannerpoq misigalugu ikiuerusunneq inunnit amerlasuunit takkuttoq, allaat Betina-mik ilisarisimanninngitsuniit, Naja Habermann tusagassiutinut nalunaarummi oqaluttuarpoq.

- Nutaaliorsinnaaneq annertuvoq aningaasanik katersuiniarnissamut isumassarsiorneranni, assersuutigalugu Nuummi tapersersuiniarnermut annertuumut aaqqissuinialerput, ilaatigut tusarnaartitsinikkut assigiinngitsunillu tuniniaanikkut. Ilimaginngeqqinnaakkatsinniillu allaat tunissutisianik pilluta. Ilaatigut eqqumiitsuliortup tusaamasaqp qalipakkani akitsorterunneqarnissaanut tunniussivoq Naja Habermann oqarpoq.

Ullumikkut tapersersuilluni peqatigiiffik nuna tamakkerlugu katersuiniarnissani ammarpaa, aningaasat Betinap katsorsarneqarneranut atugassat.

Tapersiissutit tamarmik qujarullugit uunga konto-mut ikineqarsinnaapput: 6471-1269000

Katersukkat Betina-p katsorsarneqarneranit annertunerussappata, Betina-p kissaatigivaa sinneruttut Ikuala-mut tunniunneqarnissai.

“Betina Kristiansen pillugu tapersersuiniaqatigiiffik”-mik aallarnisaapput: Naja Habermann, Ivalu Guldager, Carla Fussing aamma Arnannguaq Gerstrøm.