Konservativit oqaaseqartartuat: Danskit Kalaallit Nunaannut tungatillugu soqutiginnippallaannginnerat kangusuusaarnaq

Konservativit Kalaallit Nunaannut tunngatillugu oqaaseqartartuata isertuutinngisaannarpaa, Naalagaaffeqatigiit attatiinnarneqarnissaannut tapersersuisuunini.

Taassuma tamatumunnga peqatigitillugu oqaatigaa, Naalagaaffeqatigiinnermut tunngatillugu ajornartorsiutaanerpaasoq, danskit Kalaallit Nunaanni Savalimmiunilu pissutsinik ilisimasaqannginnerat.

- Tamanna danskit amerlanersaasa soqutiginngilluinnarpaat, danskillu tungaannit Atlantikup avannaani susoqarnersoq pillugu soqutiginnittoqannginnerunera assut kanngusuusaarnarpoq, Rasmus Jarlov oqarpoq.

Nunat pissaanilissuit Issittumut tunngatillugu soqutiginnikkiartuinnarnerat pillugu tallimanngormat folketingimi isumasioqatigiittoqarmat oqaatsit taakku anninneqarput. Tassunga atatillugu folketingimi politikkerit oqallitsinneqarmata, apeqqutigineqarpoq Donald Trumpip pisiaqarnissamik neqeroorutaa tamanit ilisimaneqartoq eqeersaataasimanersoq.

- Ilisimasaqanngitsut

Rasmus Jarlov nammineerluni ukiut ingerlanerini Kalaallit Nunaannut Savalimmiunullu tunngassuteqartut pineqartillugit eqeersimaartumik suleqataalluartarsimavoq, nassuerutigaali tamanna amerlanernit atorneqanngitsoq.

- Kalaallinut Savalimmiormiunullu uggornarluinnartoq eqqaassagaanni tassaavoq, Danmarkimukaraanni danskisut oqalussinnaalluni Danmarkimilu susoqarneranut malinnaasimalluni paasilerlugu, atlantikup avannaanni naalagaaffeqatigisat qanoq inuuneqarnersut pillugit danskit ilaasa ilisimasaqanngilluinnarnerat. Tamanna peqatigiittut misigisaqarnermut aserorsaaqataavoq, immaqa allanut sanilliullugu ingasannerusumik.

- Taamaammat isumaqarpunga, Naalagaaffeqatigiit avannaani susoqarneranik suli annertunerusumik eqqummaffiginninnissarput pingaaruteqarluinnartoq. Danmarks Radiop susoqarneranik takutitsinerusarnissaa, meeqqat atuarfiini sammineqarnerusarnissaat. Aamma uangut folketingimi soqutiginninnerunissarput, aamma kalaallit folketingimi ilaasortat peqataatinneqarnerunissaat, Rasmus Jarlov oqarpoq.

Kalaallit folketingimi ilaasortat illersornissamik isumaqatigiissummut peqataatinneqassasut

Aaja Chemnitz Larsenip (IA) kalaallit folketingimi ilaasortat folketingimi naalakkersuisunilu sulinermut ilaatinneqarluinnarnissaanik anguniagaqarnera tapersersorpaa.

- Piffissami sivitsortumi oqaatigisarsimavara, Aaja illersornissamut isumaqatigiissutitsinnut peqataatinneqassasoq, illersornissarmi Kalaallit Nunaanni initoorujussuummat tupinnarluinnarpoq, kalaallit politikkeriinik illersornissamik isumaqatigiissummut peqataasoqannginnera, tamattami tamanna ataatsimoorluta susassaqarfigaarput. Danskit politikkerit ilaasa Naalagaaffeqatigiit qanoq ingerlanneqarnerat paasisimanangu oqartarput, illersornissat danskit susassaqarfigigaat.

- Danskit susassaqarfiinik taaguuteqartoqanngilaq. Kalaallit Savalimmiormiullu immikkut susassaqarfeqarput, tamatuma saniatigut ataatsimoorluta susassaqarfeqarpugut. Ataatsimoorluni susassaqarfiit pineqartillugit danskit naalakkersuisui Naalagaaffeqatigiinnut tamanut naalakkersuisuusut aamma Danmarkimi folketingi Naalagaaffeqatigiinnut tamanut folketingiusoq alajangiisarput, taamaammat kalaallit savalimmiormiullu folketingimi ilaasortat peqataatinneqarnerusariaqarput, Rasmus Jarlov taamak isumaqarpoq.

Aaja Chemnitz Larsen (IA) tapersersuinermut qujassuteqarpoq.

- Soorunami illersornissamik isumaqatigiissummut peqataassaagut, Aaja oqarpoq nangillunilu oqaatigalugu, illersornissamik isumaqatigiissummut arlaatigut peqataalesinnaaneq isumalluarnartoq.