Konservativet danskit naalakkesuisuisa silap pissusaanut tunngatillugu anguniagaannut ikorfartuissallutik piareeqqasut

Konservativet siulittaasuata, Søren Pape Poulsenip, assani paartiinut saamerlernut isaappai, naalakkersuisullu 2030-mi CO2-mik aniatitsinerup 70 procentimik annikillisinneqarnissaanik anguniagarnerannut tapersersuinissamut piareeqqalluni.

Partiimi siulittaasoq Søren Pape Poulsen aviisimut Børsenimut taamatut oqarpoq. Silalli pissusaa pillugu inatsisissaq siumoortumik tapersernianngilaa. Taamaaliussappat naalakkersuisut qulakkeeqqaartariaqarpaat, mingutsitsinngitsumik ingerlatsinermi suliffiit ikinnerulinnginnissaat aamma ineriartornerup unikaallatsinneqannginnissaa.

- 70 procentimik anguniagaqarnermut tapersersuinitsinnut marlunnik pissuteqarpugut. Siulleq tassaavoq, ullumikkut politikkeriusugut tamatta unammillernartumut annerpaamut maanna atukkatsinnut aaqqiissuteqarnissamut, annertoorujussuarmik akisussaaffeqarnerput.

- Aappaa tassaavoq, inuttut kiffaanngissuseqarnerput, qaffasinnerusumik akileraartarnerput imaluunniit appasinnerusumik akileraartarnerput akiginngikkaluarlugit, piumagutta anguniakkatsinnik angusaqarsinnaanerput pillugu Dansk Industrip nalunaarusiaata aqqutissaqarnitsinnik takutitsinera.

- Tassa silaannatsinnut tunngatillugu ajunngitsumik iliuuseqarnerput ilutigalugu Danmark nukittorsarsinnaavarput, suliffeqarfiit pitsanngorsaaffigisinnaavavut, aningaasaqarnerput ineriartornerpullu pitsanngorsaaffigisinnaavavut, Søren Pape Ritzaumut oqarpoq.

Socialdemokraatit De Radikale aamma Enhedslisten peqatigalugit juunip qaammataani anguniagassatut aalajangiuppaat, nunami CO2-mik aniatitsinerup, 1990-imut sanilliullugu 2030-mi 70 procentimik annikillisinneqarnissaa.

Konservativet tapersersuineratigut partiit qiterlerniittut peqatigalugit amerlanerussuteqartoqalissaaq. Søren Pape isumaqarpoq ataatsimoorluni anguniakkap anguneqarsinnaanera piviusorsiortuusoq.

- Isumaqatiginninniarnermi aalajangiullugu oqaatigissavarput 70 procentimik anguniagaqarnermut isumaqataanerput. Iliuusissatulli pilersaarusiortoqalerpat, suliffinnik ineriartornermillu akeqartussanik, inatsit aqqutigalugu iliuuseqarsinnaassaagut, partiimi siulittaasoq oqarpoq.

Lars Sandahl Sørensenip, Dansk Industrimi (DI) pisortaanerup Papep piumassuseqarnera nuannaarutigaa. Peqatigitillugu pisortaanerup partiit talerperliit allat kaammattorpai tamatumunnga aamma tapersersueqqullugit.

Inuussutissarsiortut kattuffiata silamut tunngatillugu nammineq pilersaarusiani 124-nik quppernilik sapaatiummat saqqummiuppaa, tassani siunertarineqarpoq CO2-mik aniatitsineq 2030-mi 65-70 procentimik annikillisinneqassasoq. Taanna tunngavigalugu Konservativet tapersersuinertik saqqummiuppaat.

Pilersaarut nammminersortut suliffeqarfiutaanni suliffissanik 120.000-inik pilersitsisinnaavoq aamma danskit atugarissaarnerat 110 milliarder koruunit nalingannut qaffanneqarsinnaavoq, DI naliliivoq.

Sophie Løhde, Venstremi politikkikkut oqaaseqartartuugallartoq, parteertik aniatitsineq pillugu anguniakkamut tapersersuiniarnersoq pillugu Børsenip apeqqutaanut isummerusussimanngilaq.

Konservativet partiini talerperlerni kisiartaallutik silap pissusaa pillugu inatsimmut kingullermut 2014-imeersumut tapersersuisimapput.