Kommunmi pisortaq miliuunilikkaanik nalilimmik niueqateqarsimaneq pillugu: Akisuallaannginnissaa isumaqatiginninniutigisimavara

Illoqarfimmik ineriartortitseqatigiiffik Siorarsiorfik - Nuuk City Development (NCD) maanna matuneqareersoq 2019-imi halimik 12.5 millioner koruuninik akiliilluni pisiaqarsimavoq.

Deloittep ingerlatsisoqarsimaneranik misissuinermini NCD-mut atatillugu sulianik aalajangersimasunik misissuigami halimik pisiaqarsimaneq ilaatigut eqqaavaa, tassani kommunimi pisortaasimasup Lars Møller-Sørensenip kommunimi pisortaanertut NCD-p siulersuisuini siulittaasuunermini qanimut niueqatigisarsimasaminit hali pisiarisimammagu.

Misissuisimasup ilanngullugu oqaatigisimavaa, halimik pisiaqarsimaneq NCD-p ingerlatsinissamut pilersaarutaanut ilaasimanngitsoq.

Halimik tunisaqartuusimavoq John Eliassen, taassuma halimik pisiaqarnissamut soqutinnittut arlaqarsimammata oqaatigisimavaa, pisiaqarnermi ikinngummik ikiuisoqarsimanngitsoq.

- Akikinnerpaasimasoq

Kommuneqarfik Sermersuumit aamma pisiaqarnermi ikinngummik ikiuisoqarsimanngitsoq oqaatigineqarpoq. Kiffartuussigasuartarfimmi pisortaq Gert Jakobsen halip akissaanik isumaqatiginninniarsimasoq taamatut oqaluttuarpoq.

- Akisuallaannginnissaa isumaqatiginninniutigisimavara, aamma halit allat misissorsimavakka, Gert Jakobsen Sermitsiaq.AG-mut oqarpoq. Taassuma erseqqissaassutigaa kommuni halip tunniussinnaasaanik pisariaqartitsisimasoq.

Ingerlatsisoqarsimaneranik misissuisimasoq naapertorlugu, hali 883 kvadratmeterimik angissuseqartoq sannavittaqarpoq kiisalu initaqarluni 155 kvm-isut angitigisunik aamma allaffeqarlunilu nerisarfeqarpoq 97 kvm-iusunik. Pisiap akia tamarmiusoq 12,5 millioner koruuniuvoq, tassa kvadratmeterimut 14.156 koruuninik naleqartoq.

Kommuneqarfik Sermersooq pisiaqartoqarmat suliamik misissuisimavoq, halillu nalinga illunik tuniniaasartumut nalilertissimallugu. Illunik tuniniaasartup hali 12.4 millioner koruuninik naleqassasoq missingersimavaa. Naliliineq 2021-mi oktobarip qaammataani pisimavoq - tassa pisiarineqarneraniit ukiut marluk qaangiunneranni.

Professori: Malittarisassat malinneqarsimapput

Gert Jakobsenip oqaatigaa, halimik pisiaqarnissamut Lars Møller-Sørensenimit kaammattorneqarsimanani. Halilu akilerneqartussanngormat aatssaa Lars Møller-Sørensen akuliussimasoq.

Kommunimi pisortaanerusimasoq tassani aalajangersimavoq, kommuni pinnani NCD pisiaqartuussasoq. Taamaaliornikkummi pisiaqarnissaq Aningaasaqarnermut Ataatsimiititami politikkerinit akuersissutigineqartariaqanngimmat.

Aalborg Universitetimi aningaasaqarnermik aqutsinermi professorip Per Nikolaj Buhkip Sermitsiaq.AG-mut oqaatigaa, NCD aqqutigalugu halimik pisiaqarsimanermi sulia inatsit malillugu politiikkikkut suliarineqartariaqarsimanngitsoq.

- Ingerlatseqatigiiffik - matumani NCD - nammineerluni aalajangiisinnaavoq, taamaammallu aalajangersimaneq politikkikkut ataatsimiititaliami suliarineqartariaqarnani.

Suliamut attuumassuteqarpallaarsimanngitsoq

- Tamat oqartussaaqataannerannik avaqqutsisimanertut oqaatigineqarsinnaavoq, tamannali inerteqqutaanngilaq, Per Nikolaj Bukh oqarpoq. Taassuma erseqqissaassutigaa, kommunip halimik pisariaqartitsinera matumani qitiusoq, halilu kommunip allanik pisiarisimasinnaasaraluanit akikinnerusoq.

Lars Møller-Sørensenip halimik tunisaqartoq John Eliassen ingerlatseqatigiiffiup siulersuisuini ilaasortaaqateqarsimaneranut atatillugu Per Nikolaj Bukhip tamanna aamma ajornartorsiutaanngitsutut nalilerpaa.

Tamatumunnga pissutaavoq, Lars Møller-Sørenseni ingerlatseqatigiiffiup siulersuisuinit 2017-imi ilaasortaajunnaarsimanera aamma halimik aatsaat 2019-imi pisiaqartoqarsimanera.

Ekstra Bladetsimit aamma oqaluttuarineqarpoq, Lars Møller-Sørensenip Nuummi inigisaa John Eliassenimit pigineqartoq. Taannaannaq tunngavigalugu Lars Møller-Sørensen suliamut attuumassuteqarpallaartutut naliliiffigineqarsinnaanngilaq, Per Nikolaj Bukh, Lars Møller-Sørensen mianersornissamik tunngaveqarnissaq eqqarsaatigalugu suliamut attuumassuteqarpallaarnerminik nassueruteqarsimasinnaagaluartoq erseqqissaassutigalugu oqarpoq.