Skip to main content

Kommunit tallimat aningaasaliissuteqartartunut neqeroorutigerusutaat

Nunami kommunit tallimaasut aningaasaliissuteqartartumut 500 millioner koruuniuteqartumut saaffiginnittuugunik inissianut, akunnitarfinnut attaveqaasersuutinullu aningaasaliissuteqarnissaat siunnersuutigissagaluarpaat. Future Greenland nunami maani aningaasarsiornikkut siuariartorneq pillugu sapaatip-akunnerani kingullermi ataatsimeersuartitsimmat borgmesterinut apeqqutigineqartut tamanna ilagisivimavaat.

Future Greenlandip Nuummi ataatsimeersuartitsinera qanittukkut naammassineqartoq naggaserlugu borgmesterit tallimaasut sammisaqartinneqarput, tassani suleqatigiissitat borgmesterinut apeqquteqarsimallutik. Suleqatigiissitat ulluni marlunni sammisaqartitsinermi borgmesterinut apeqqutinik suliaqarsimapput, imatut qulequtserlugu: Aningaasarsiornikkut siuariartorneq, oqaluuserisassaq nutaaq: Qanoq iliortoqassava – takorluukkaniit iliuuseqarnermut?

Borgmesterinut apeqqutit ilaat imatut nipeqarpoq: Aningaasaliissuteqartartoq 500 millioner koruuniutilik takkulluni kommunissinnut aningaasaliissuteqarusuttuuppat, aningaasaliiffigisassatut periarfissaq ilissinnut pitsaanerpaaq sunaava?

Akunnittarfiit akisuut ataatsimeersuartarfiillu

Qeqqata Kommuniani borgmesteri Malik Berthelsen erseqqissumik oqaaseqarpoq. Kommuni Kangerlussuup Sisimiullu akornanni aqqusinermi akunnittarfinnik illuaqqanillu kusanarluinnartunik sanaartornissamut piareeqqavoq.

- Sisimiut Kangerlussuullu akornanniittup, Nunarsuarmioqatigiinnut kingornussassanngortinneqarsimasup Aasivissuit - Nipisaat eqqaanniittoq immaqa nuarsuarmi isikkiviginnerpaavoq. Aningaasaliissuteqartartoq tassa akunnittarfinnik kusanarluinnartunik illuaqqanillu sanaartortitsisinnaavoq, borgmesteri akissuteqarpoq. 

Kommunimut pilersaarut piareeqqavoq sumiiffinnullu arlalinnut aningaasaliissuteqarfigineqarnissamut akuerineqareersimalluni, borgmesteri erseqqissaavoq.

Kommuneqarfik Sermersuumi borgmesteri Charlotte Ludvigsen illoqarfiit pingaarnersaata takornarianut inuussutissarsiuteqartunullu ukioq naallu soqutiginarsarneqarnissaanut aningaasaliissuteqarnissamut piareersimavoq.

- Aningaasaliissuteqartartut kommunitsinnukarlutik akunnittarfinnik Kulturikkullu illorsuarmik, Reykjavikimiittumi Harpamiittutut ittumik, ataatsimeersuartitsisunit atorneqarsinnaasumik sanaartornissamut tikilluaqqusaapput.

Attaveqaasersuutit takornariartitsinermut pitsanngorsaasinnaasut

Borgmesterip itisiliilluni oqaatigaa, kommuni illoqarfiit pingaarnersaannut atatillugu periusissiamini kommunip sammisassaqartitsiviunissaa aamma takornariartitsinermik ingerlatsisutut illoqarfiunissaa anguniagarigaa. 

- Nutaamik timmisartoqarfeqalernissaq aamma Issittumut soqutiginninnerujussuaq eqqarsaatigalugit taakkununnga aningaasaliissuteqarnissaq pitsaasuussasoq qularinngilara, Charlotte Ludvigsen oqarpoq.

Kommuni Kujalleermi borgmesterip Stine Egedep (IA) Kujataani attaveqaasersuutit pitsanngorsaaffigerusuppai. Aningaasaliissuteqartartumut tamanna qanoq iluaqusiisinnaanersoq aaqqissuisoqarfimmit akissutissarsineqanngilaq.

- Illoqarfiit pingasut nunaqarfiillu aqqanillit periarfissaqarfiusuni aqqusinernik ikaartarfinnillu atassusissagaluarpakka, taamaattoqarsinnaanngippat umiarsualivinni nunniukkat niusarfiillu puttasut pitsanngorsaaffigerusuppakka.

Stine Egedep erseqqissaassutigaa, attaveqaasersuutit pitsaasut timmisartoqarfissallu nutaap takornariartitsisarnerup ineriartortinneqarnissaanut periarfissiissasut.

Takornariaqarneq inissiallu

Palle Jerimiassen aamma kommunip ineriartortinneqarnerani summiiffinnut arlalinnut aningaasaliissuteqartoqarnissaa kissaatigaa.

- Kommunimi aningaasaliiffigineqarsinnaasunik arlalinnik periarfissaateqarpugut, aamma illoqarfiup ineriartortinneqarnissaanut pilersaaruteqarlutalu takornariartitsisarnermut suliniuteqarpugut aningaasaliiffigineqarsinnaasunik. Kommunimi aamma inissiat amigaataapput, kommunimimi tamarmik inissaaleqisoqangaatsiarmat tamanna aningaasaliiffigissallugu isumannaatsuuvoq. Aamma inuussutissarsiutitigut ingerlatsilluartunut umiarsualivinnik amigaateqarpugut, taakkulu aningaasaliiffigissallugit periarfissaavoq.

Soorunami aamma takornariartitsisarneq:

- Takornariartitsisarnermut atatillugu ukiuunerani takornariartitsisarnissap ineriartortinneqarnissaanut aningaasaliissuteqartoqarnissaa kissaatiginarpoq, Ilulissat kangianut sermersuarmullu isikkivilimmi ukiukkut, issittumi, qimussertitsilluni illuaqqamiisitsillunilu takornariartitsisarnissaq anguniagaraarput.

Kommuni Qeqertalimi borgmesterip Ane Hansenip aqqusaarfiusartumik umiarsualiveqarnissaq (transithavn) kissatiginerpaavaa. Tamatuma saniatigut takornariartitsisarnermut akunnittarfinnullu aningaasaliissuteqartoqarnissaa kissaatigineqarpoq, kommuni imminut napatittumik takornariartitsisarnissamik soqutiginnittuummat, borgmesteri naatsumik akissuteqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER