Kommunit sullissisarnerat innuttaasunit nalilersorneqassasoq

Qanimut oqartussaaqataaneq innuttaasunillu sullissisarneq innuttaasut naammagisimaarinninnerannik misissuinikkut innuttaasunit nalilersorneqassapput. Inatsisartut taamatut aalajangersimapput.

Kommunit ataatsimoortinneqarnerannit kommunerujussuillu 2009-mi atuutsinneqalernerannit ukiut qulit sinnerlugit qaangiutereeraluartut suli oqallitsitsinermik pilersitsisarput.

Aaqqissuusseqqinnermi kommunit 18-init sisamanut ikilisinneqarput, kingusinnerusukkullu Qaasuitsoq marlunnut avinneqarluni, taamaalilluni ullumikkut nunatsinni tallimanik kommuneqarpoq. Tallimanik kommuneqarnissamik maanna aaqqissuussaasoq misissuinermi innuttaasunik peqataaffigineqartussami nalilersorneqassaaq.

Innuttaasut misilittakkatik aamma kommunit aaqqissugaanerata qanimut oqartussaaqataanerut innuttaasunillu sullissisarnermut qanoq sunniuteqarsimaneranik innuttaasut misigisimasatik oqaluttuarissavaat.

Atassut siunnersuuteqartuusoq

Inatsiseqarnermut Ataatsimiititaliaq isumaqatigiittoq misissuisoqarnissaata akuerineqarnissaanut inassuteqarsimavoq.

Nalilersuisoqarnissaa Atassummi siulittaasup Aqqalu Jerimiassenip siunnersuutigeqqaarsimavaa.

Siunnersuutigisimavaa, kommunit aaqqissugaanerisa allannguutaat pillugit Naalakkersuisut nalilersuinissamik suliaqaqqullugit peqquneqassasut, tassani aaqqissuussaanermi allannguutaasimasut pitsaaqautai ajoqutaalu nalilersorneqassapput, sumiiffimmilu demokratiimut kommunillu aningaasaqarnerannut sunniuteqarsimanersoq, kiisalu allaffissornikillisaaniarnermut siunertaasimasoq piviusunngortinneqarsimanersoq nalilersorneqassallutik.

Miliuuninik akeqassasoq

IA-milli allannguutissatut siunnersuuteqartoqarpoq, tassani suliassaq annikillisillugu innuttaasut naammagisimaarinninnerannik misissuisoqarnissaa siunnersuutigineqarluni, innuttaasunik sullissisarneq qanimullu oqartussaaqataaneq qitiutinneqassalluni, siunnersuullu tamanna marlunngornermi akuerineqarpoq.

Naalakkersuisup Jess Svanep (S) akuersissuteqartoqarneranut atatillugu eqqaasississutigaa, misissuinerup naammassineqarnissaanut 2023-2024-imi millionit ataatsimik kisitsisitallit Nunatta Karsianit nassaarineqassasut.

Inatsisartuni politikkerit aalajangersimavaat, misissuineq 2024-mi ukiakkut naammassineqareersimassasoq.

Powered by Labrador CMS