kommunit
Kommunit suleqatigiinnerannik nutaamik IA-meersoq ujartuivoq
Avannaata Kommuniani ikaarsaariarnermut ataatsimiititaliamut ilaasortaq, Bendt B. Kristiansen (IA), kommunit kattuffiannik KANUKOKA aqqutiginagu aaqqissuuteqqitamik ujartuivoq.
- Inuit Ataqatigiit ornigineruarput kommunit ataatsimut suleqataaffigisaanik aaqqissuusseqqittoqassasoq, tamannalu ilusilerneqarsinnaalluartoq KANUKOKA aqqutiginagu.
Avannaata Kommuniani ikaarsaariarnermut ataatsimiititaliami ilaasortaq, Bendt B. Kristiansen (IA), tusagassiuutinut nalunaarummi allappoq.
Kommunit akimorlugit suleqatigiinnermik pilersitsinissaq pisariaqartoq, taanna isumaqarpoq, kommuninngortussat tallimat unammilligassaasa assigiiffeqarnermata.
- Kommunit akornanni oqaloqatigiinnerit aallartitsigit, nutaamik nassaareqatigiinnissamik anersaaqartut, taanna erseqqissaavoq.
IA: KANUKOKA siunissaqanngilaq
Sulisoqarnerinnakkuunngittoq, misilittakkatigut meeqqat inuusuttullu sullinneqarneranni minnerunngitsumillu aningaasaqarnikkut ingerlatsinermi naligiissaarinermi periutsit eqqarsaatigalugittaaq
Kommunit kattuffiannik KANUKOKA-mik kommunit pisariaqartitsinerat taamaatittoq, peqatigisaanik uparuarpaa.
- Kommunit ataatsimut soqutigisaat salliutinneqarunnaarsimapput, amerlanerussuteqarneq atorlugu aalajangersaaneq kommunit ataasiakkaat inissinneqartarnerat atorneqalerluni, tamannalu KANUKOKA-p siunertaaniinngilaq, taamaammallu isasoorsimalerpoq.
Avannaata Kommuniani ikaarsaariarnermut ataatsimiititaliami siulittaasup, Palle Jerimiassenip (S), KANUKOKA-mut ilaasortaanissaq apeqqusernikuuaa, tamannalu Avannaata Kommuniani Inuit Ataqatigiinnit taperserneqarpoq.