Nakkutilliisoqarfik
Kommunit Nakkutilliisoqarfiat qaqutigut suliamik aalajangiisarpoq
Kommunit Nakkutilliisoqarfiat ilaasortaasalu tallimat suliami naliliillutillu aalajangiisarnerat qaqutigoortorujussuuvoq. Ukiuni tallimani kingullerni nakkutilliisoqarfik marluinnarnik suliaqarsimavoq.
Siumumit kommunalbestyrelsimut ilaasortat marluk Ane Egede Mathæussen aamma Peter Davidsen Kommuneqarfik Sermersuumeersut, inissianut suliniuterujussuarmut Siorarsiorfimmut atatillugu Kommunit Nakkutilliisoqarfia ingerlatsinermut misissuinissaanik piumasaqarput.
Suliarinnittussarsiortoqanngitsoq
IA-meersoq borgmesteri Asii Chemnitz Narup kommunalbestyrelsimut aamma innuttaasunut eqqunngitsunik paasissutissiisimasoq aammalu siunnersortitut suliassat suliarinnittussarsiuunneqarsimannginnerarlugit taakku isumaqarput.
Taakkunannga kommunalbestyrelsimut ilaasortanit saaffiginnissut tiguneqarsimasoq, nunami namminermut naalakkersuisoqarfimmi allaffimmi pisortaq Martha Abelsen Sermitsiaq.AG-mut ilisimatitsivoq.
- Suliassamik isumaginninneq maanna aallartipparput, Martha Abelsen ilisimatitsivoq, qaqugu aalajangiisoqarsinnaanera taassuma nalilersinnaanngilaa.
Aamma atuaruk: Unnerluut: Nuummi borgmesterip kikkut tamaasa uukapaatikkai
Suliat amerlasuut Kommunit Nakkutilliisoqarfiata ilaasortai tallimat ilanngutinngikkaluarlugit allaffissornikkut iluarsineqartartut, taanna ilisimatitsivoq.
- Kommunit Nakkutilliisoqarfiat maalaartarfiunngilaq, tamanna ilaasa kukkusarpaat. Taamaattumik suliat amerlasuut allaffissornikkut aaqqittarpagut, pineqartut eqqortumut saaffiginninnissaannut ignerlateqqittarlutigit, allaffimmi pisortaq ilisimatitsivoq.
Nakkutilliisoqarfiup ilaasortai
Kommunit Nakkutilliisoqarfiup ilaasortai ukuupput:
- Siulittaasoq Sólja í Ólavstovu Savalimmiuni ombudsmandi (Nunatta eqqartuussisuuneranit toqqagaq)
- Ruth Heilmann (Inatsisartunit toqqagaq)
- Inatsisartuniit ilaasortaq Agathe Fontain (Inatsisartunit toqqagaq)
- Kommunalbestyrelsimut ilaasortaq Simon Simonsen (KANUKOKA-mit toqqagaq)
- Kommunalbestyrelsimut ilaasortaq Hans Aronsen (KANUKOKA-mit toqqagaq)
Suliat allaffissornikkut iluarsineqartut
2014-imili suliat ima amerlatigisut suliarineqarlutillu allaffissornikkut matuneqarnikuupput:
- 2014: Suliat pingasut
- 2015: Suliat pingasut
- 2016: Suliat tallimat
- 2017: Suliat marluk - suliaq maanna ingerlasoq ilanngullugu.
Kommunit Nakkutilliisoqarfianni ukiumut ataasiarlutik ataatsimiittarput, ileqquusumillu ataatsimiinnissap tullia apriilip naanerani maajip aallartinneraniluunniit pisaaq.
Aamma atuaruk: Siunnersortit suliaat millionilik
Ukiuni tallimani kingullerni Kommunit Nakkutilliisoqarfiata suliat marluk suliarisariaqarsimavai. 2016-imi ataaseq, tassanngaanniillu 2012-imili nakkutilliisut kingullermik suliaqartariaqarsimapput.