meeqqat inuusuttuaqqallu

Kommunit meeqqanut inuusuttuaqqanullu sumiginnaanerannut ataatsimiisitaliaq annilaartoq

Ilaqutariinnermut peqqissutsimullu Inatsisartuni ataatsimiisitaliaq Qaasuitsup Kommunianut Qeqqatalu Kommunianut isumaginninnikkut nakkutilliiartorsimanerit inernerinut annilaartinneqarpoq. - Pisuni aalajangersimasuni inatsisinik unioqqutitsisoqarsimavoq, ataatsimiisitaliaq allappoq

Demokraatineersoq Tillie Martinussen Inatsisartut ilaqutariinnermut peqqissutsimullu ataatsimiititaliaani siulittaasuuvoq

Inatsisartut ilaqutariinnermut peqqissutsimullu ataatsimiititaliaa Qaasuitsup Kommuniata Qeqqatalu Kommuniata meeqqanik inuusuttunillu inuuniarnikkut ulorianartorsiortunik sumiginnaaneranut assut annilaarnartinneqarpoq.

Tamanna pivoq ilaqutariinnermut peqqissutsimullu ataatsimiititaliap ilaqutariinnermut, naligiissitaanermut isumaginninnermullu naalakkersuisoq, Siumumeersoq Martha Lund Olsen Qaasuitsup Kommuniani Qeqqatalu Kommuniani isumaginninnikkut nakkutilliiartorsimanerit eqqartorlugit ataatsimeeqatigereeraalu.

- Pisuni aalajangersimasuni inatsisinik unioqqutitsisoqarsimasoq ataatsimiititaliamut paasissutissiissutigineqarpoq. Meeqqanik inuusuttunillu sakkortuumik sumiginnakkanik nalunaarutiginninnerit kommunit ajoraluartumik iliuuseqarfigisarsimanngilaat, Inatsisartut ilaqutariinnermut peqqissutsimullu ataatsimiititaliaata siulittaasua, Demokraatineersoq Tillie Martinussen tusagassiuutinut nalunaaruteqarluni taama allappoq.

Atuaruk: Ilaqutariinnermut naalakkersuisoq sisamassaat isumasiorneqassaaq

Tillie Martinussenilu ima nangippoq:

- Ilaqutariinnermut, naligiissitaanermut isumaginninnermullu naalakkersuisoq naapertorlugu ataatsimiititaliap paasivaa pinerluttulerinermi inatsimmik unioqqutitsisoqarsimasinnaanerata nalilerneqarnissaa siunertaralugu politiit attavigineqarsimasut.

Kommunini allani aamma nakkutiilleeqqusipput
Iliuuseqartannginnerit taamaattut kommunini allani atuussinnaanerat ataatsimiititaliamit aamma assut ernummatigineqarpoq, taamaattumillu nakkutilliinerit Kommuneqarfik Sermersuumi Kommune Kujallermilu aamma ingerlanneqassasut ataatsimiititaliamit kaammattuutigineqarpoq.

- Meeqqat inuusuttullu kinguaassiuutitigut atornerlugaanermikkut, nakuuserfigineqarnermikkut allatigulluunniit akuersornanngitsumik pineqarnermikkut ilungersuuteqarnerat iliuuseqarnata isiginnaaginnarsinnaanngilarput, kommuninimi nukissat naammanngillat, taamaattumillu meeqqat inuusuttullu iliuuseqarfigineqarnatik immineerneqartarlutik. Taamaaliornikkut pisortat sumiginnaapput, tamannalu Naalakkersuisut suleqatigalugit aaqqiiviginiarlugu ataatsimiititaliamit sapinngisarput tamaat iliuuseqarfigerusupparput, Tillie Martinussen ilaqutariinnermut peqqissutsimullu ataatsimiititaliaq sinnerlugu tusagassiuutinut allappoq.

Sermitsiaq.AG-mit Namminersorlutik Oqartussat Qaasuitsup Kommuniani Qeqqatalu Kommuniani isumaginninnermi nakkutilliisimanerannit erniliussaq piniarneqarpoq.

Powered by Labrador CMS