Kommunit eqqakkanik DK-mut nassiussisarnissamut piareeqqasut
Esani aasamut sineriammi eqqakkanik katerseriarluni Danmarkimut assartuisarnissamut avatangiisinut aningaasaateqarfimmit aningaasaliiffigineqarsimavoq. Aaqqiissutaasartoq Kommuneqarfik Sermersuumit atorneqareersoq kommunit sinneranit maanna atorneqartussanngorpoq.
Nunami maani illoqarfinni nunaqarfinnilu arlalinni innuttaasut tipersuarmik minguttunillu misigisaqartarput, eqqakkat anorlertillugu eqqaavissuarmit teqqartaramik.
Sermitsiaq.AG-mit Nanortalimmi ajornartorsiut tamanna pillugu qanittukkut oqaluttuarineqarpoq, Nanortalimmili kisimi tamanna ajornartorsiutaanngilaq. Kujataatalu kommuniani eqqakkanik Danmarkimut nassiussisarnissamut piareersimapput.
- Eqqakkat qanoq annertutigisut maaniikkunnaartikkusutavut kisitsisaatiginngilakka, periarfissarli atorluarusupparput, Kommuni Kujallermi Teknikkimut Aavatangiisinullu Ingerlatsivimmi pisortaq Sem Ottosen oqarpoq.
Kommuni Qeqertalimmit aamma naatsorsuutigineqarpoq, ESANI.mit neqeroorutip atorluarneqarnissaa. Eqqakkalli qanoq annertutigisut suli erseqqissumik oqaatigineqarsinnaanani.
- Qaammatip tulliata ingerlanerani akissuteqarsinnaanissarput naatsorsuutigaarput. Eqqakkat suut sumiiffinni assigiinngitsuni uninngasuutiginerivut kiisalu eqqakkanik tonsinik qassinik oqimaatsigisunik assartorneqarnissamut piareersimasoqarnersoq paasiniarlugit sapaatip-akunnerini tulliuttuni naatsorsuissaagut, Kommuni Qeqertalimmi Aningaasaqarnermut pisortaq Nicolai Odgaard Jensen oqarpoq.
Kangerlussuarmi eqqakkanut akisussaasuunngitoq
Qeqqata Kommuniani Teknikkeqarnermut Aavatangiisinullu ingerlatsivimmi pisortap Tuperna Rix-ip oqaluttuaraa, kommunimi inissisimanertik allaanerulaartoq.
-Kommuni Kangrlussuarmi eqqakkanik isumaginninnissamut akisussaasuunngilaq, suliniuteqarpugulli sikueruppat aallartitassatsinnik. Suliniut avatangiisinut aningaasaateqarfimmit tapiissutit atorlugit ukiut marluk tulliuttut ingerlaneranni suliarineqassaaq, taanna oqarpoq.
Mittarfeqarfiit Kangerlussuarmi eqqakkanik isumaginnittartuuvoq.
Kommunimi eqqakkat sinneruttut Sisimiuni ikuallaavimmukaanneqartarput, kommunimi taamaammat eqqakkanik sumitamaaniittunik tipeqartunillu illoqarfinni nunaqarfinnilu teqqartoqartarneranik imatut ajornartorsiuteqartoqanngilaq.
- Isumassarsiamut ammavugut (eqqakkanik Danmarkimut assartuisarnissamut), Esanimilli neqeroorut suli isummerfiginngilarput, Tuperna Rix oqarpoq.
Eqqakkat tonsinik hunnorujulikkaanik oqimaassusillit nassiunneqartartut
Kommuneqarfik Sermersuumi Attaveqartarnermut pisortap Lars Damkærip Sermitsiaq.AG-mut ilisimatitsissutigaa, eqqakkat ikuallanneqarsinnaasut ullumikkut Kommuneqarfik Sermersuumi isumagineqartaraluartut, kommunip illoqarfiini nunaqarfiinilu eqqakkat katersorneqarsimasut ilaasa Danmarkimi isumagineqartussanngorlugit nassiunneqarnissaat kommunimit ulllumikkut suli pisariaqartinneqartoq.
Kommunip ikuallaavia tamakkiisumik ingerlagaluartoq aamma siorna eqqakkat 13.000 tonsit missaanniittut ikuallanneqarsimagaluartut, eqqakkat 400 tonsit poortorneqarsimasut Kommuneqarfik Sermersuumit Danmarkimut nassiunneqarsimapput.
- Kommuneqarfik Sermersuumi qularinngilarput, eqqakkat 4-500 tonsit ukioq manna Danmarkimi isumagisassanngorlugit nassiutissallutigit, Lars Damkær oqarpoq.
Nunami kommunit ilaat ataaseq Esanip pilersinneqarneraniit ukioq ataaseq suli qaangiutinngitsoq Esanimut ilaajunnaarsimavoq, kommunimit isumaqartoqarmat isumaqatigiissut kommunimut akisuallaartoq. Kommni eqqakkanik ikuallaanissamut immikkut akuerineqarsimavoq, akuersissulli atorunnaarsinneqassaaq Sisimiuni Nuummilu ikuallaavissat atorneqarnissamut piareerpata. Taamaammat kommunimit eqqarsaasersuutigineqarpoq, Esanimut peqataaqqilertoqassanersoq.
Esanimut peqataanngitsoq
Esanip aasap ingerlanerani eqqakkanik katersuinissamik neqerooutaanut akuersaarnissamut periarfissanik kommuni misissuileruttorpoq.
- Avannaata Kommunia Esanimut peqataanngilaq, eqqakkalli pingaartumik aasaanerani ajornartorsiutaanerpaasartut peerneqarnissaannut periarfissaasinnaasunik tamanik misissuivugut, Avannaata Kommuniani Teknikkeqarnermut Ingerlatsivimmi pisortaq Karl Madsen Sermitsiaq.AG-mut oqarpoq.
- Piiarneqassappatali poortuinissamut periarfissaqartariaqarpugut, sumiiffinnilu tamani tamanna periarfissaanngilaq.
Tamatuma saniatigut umiarsuup tikinnissaata tungaanut eqqakkat toqqorsivissaqartariaqarput, Esanillu eqqakkanik aallertarnissaa isumaqassappat kommuni eqqakkanik aalajangersimasunik amerlassusilinnik poortuisartussaassalluni, pisortaq erseqqissaavoq.
- Unammilligassat suunersut ilisimareerpavut, neqeroorutigineqartulli arlaatigut atorneqarsinnaanera maanna misissuiffigaarput, Nunatsinnimi kommunit allat assigalugit eqqakkatigut annertuumik unammilligassaqarpugut.