kommunit avinneqarnerat

Kommunit avinneqarnerat: Ima amerlatigisut nuussapput

Qaasuitsup Kommuniani Ilulissani allaffeqarfimmi sulisut 24-t Aasiannut nuuttussanngorlugit Kommune Qeqertalimmi atorfimmik neqoroorfigineqarput

Uani Ilulissani kommunip allaffia takuneqarsinnaavoq.

Avannaata Kommuniani aamma Kommune Qeqertalimmi sulisut qanoq avinneqarnissaat maanna aalajangiunneqarpoq.

24-t Aasianni atorfimmik neqeroorfigineqartut
Kommunimi atorfillit qanoq amerlatigisut Kommune Qeqertallip qitiusumik allaffeqarfissaani Aasianni sulinissamut neqoroorfigineqassanersut kommuninngortussat marluk isumaqatigiissutiginiarsimavaat.

Atorfiit 143-t isumaqatiginninniutigineqarput, sulisullu pissangallutik kikkut nuuttussanngussanerat utaqqinikuuaat.

Atuaruk: Kommunimi sulisut aalajangiuffigineqalertut

Atorfiit 100-t avinneqarnerat
- Ilulissani atorfinnit 100-nit 60-t illoqarfimmiiginnassapput, sulisullu 43-t Aasianni sulissallutik, taakkunannga 24-t Aasianni atorfimmik neqeroorfigineqaqqammerput, Benedikte Mølgaard Kommune Qeqertalimmeersoq Sermitsiaq.AG-mut oqarpoq, taassuma saniatigut ilisimatitsissutigaa, 43-nit 19-it Aasiannut imaluunniit Kommune Qeqertaliup ilaani allanut nooreersimasut.

Taamaalilluni sulisut 24-t Ilulissat qimallugu Aasiannut nuussanerlutik aalajangertussanngorput. Aasiannilu atorfimmik neqeroorfigineqartut qanoq amerlatigisut nuukkusunnerst paasinissaa tullinnguuppoq.

- 24-iusunit Aasianni atorfimmit neqeroorfigineqartut ilaat illoqarfinni Kommune Qeqertalimmiittussani sulisareerput, assersuutigalugu Qeqertarsuarmi. Neqeroorut akuerissaneraat maanna apeqqutaaginnalerpoq. Sulisut Aasianni atorfimmik neqeroorfigineqartut oktobarip 27-ata tungaanut aalajangernissaminnut periarfissalerneqarput, Benedikte Mølgaard ilisimatitsivoq.

Taamaatinnerit
- Aasiannut nuunnissamut neqeroorummik itigartitsisoqarpat, neqeroorummik itigartitsisut atorfitsik taamaatittariaqassavaat, Benedikte Mølgaard oqarpoq.

Powered by Labrador CMS