Kommunit atualeqqaarfimmi maleruaqqusaliortut
Nunami kommunit coronap ajornartorsiortitsinera eqqarsaatigalugu isumaqatigiissuteqarsimapput, maleruaqqusat arlallit qanittukkut atualeqqaarfissiorluni nalliuttorsiortoqarnerani atuutsinneqassasut.
Nunami meeqqat aggustip qaammataa qiteqqpput atuanngiffeqarunnaassapput, atuartullu mikinerit atualeqqaarfiussallutik.
Atualeqqaarfik meeqqanut angajoqqaanullu immikkuullarittuaannarpoq, aamma ukioq manna immikkuullarittussaavoq naak ilaatigut allaanerussuteqalaartussaagaluarluni. Kommuneqarfik Sermersooq nittartakkamini allappoq.
Kommunimit ilisimatitsissutigineqarpoq, kommunit tamarmiullut isumaqatigiissutigsimagaat, atualeqqaarfissiornermi maleruaqqusanik atuutsitsisoqassasoq.
- Angajoqqaat kisimik atuarfimmeeqataasinnaapput
- Illoqarfimmi atuarfiit nunaqarfimmilu atuarfiit soorunalimi assigiinngissuteqarput, aallaaviatigulli nuna tamakkerlugu maleruaqqusat atuutissapput, kommuni allappoq:
Ullormi aaqqissuussat sapinngisamik silami ingerlanneqassapput.
Angajoqqaat atuartullu kisimik atuarfimmut isersinnaapput aamma atuartut ilinniartitsisullu kisimik klassimut isersinnaapput.
Atuarfinni anginerpaani atuariartorfissat nikingasinnaapput.
- Soorunami puigorneqassanngilaq meeqqanut atualertussanut angajoqqaajusunnullu ulloq atualeqqaarfik tassaammat immikkuullarissoq puigunaatsorlu. Taamaammat kommuniniit tamaniit atuartunngortunut atualersitsisunullu tikilluaqqusillutalu pilluaqqusivugut, kommuni allappoq.
Atuarfiilli nalinginnaasumik skema malillugu amerlanerpaatigut ingerlajumaartut ilanngullugu ilisimatitsissutigineqarpoq.