Kommunit 20 millioner koruuninik ikinnerusunik tapiiffigineqassasut

Ukiut tamaasa kommunit akileraarutitigut iluanaarutaasa nikingassutaat aamma innuttaasumut ataatsimut kommuninut ataatsimut akileraarutaasa agguataarneqartarnerat nalimmassarneqartarput. 2019-imut sanilliullugu illoqarfiit pingaarnersaannut tapiissutissat 32 millioner koruuninik ikinnerussapput, akerlianik assersuutigalugu Kommune Qeqertgalimmut tapissutit ukiut pingajssaannik qaffanneqassallutik.

Agguaassisarneq

Ukiuni pingasuni kingullerni agguaasisimanerit imatut isikkoqarput:

Kommuneqarfik Sermersuumi pisortaanerup Lars M’øller-Sørensenip paasisinnaanngilaa, sooq illoqarfiit pingaarnersaannut tapiissutit 41 millioner koruuniniit 73 millioner koruuninut qaffariarlutik ukiup tulliani 41 millioner koruuninngorteqqinneqarnersut.

- Namminersorlutik Oqartussat Kommuneqarfik Sermersuup tapiissutissai qanoq naatsorsorsimaneraat paasiuminaatsippakka. Nalunngilara nunami kommunit akileraarutitigut tunngavii nalinginnaasut qaffannikuusut, taamaammat agguaassisimaneq tapiissutillu annertussusaasa nikerarnerujussuat paasiuminaatsippara, Lars Møller-Sørensen Sermitsiaq.AG-mut oqarpoq.

Tunngaviit allanngortinneqanngitsut

Aningaasaqarnermut Naalakkersuisoqarfimmit ilisimatitsissutigineqarpoq, nalimmassaasarnermik aaqqissuussamut tunngaviit 2009-miit 2017-imut atuussimasut, kommunit sisamaariarlutik tallimanngormata iluarsineqarsimasut, allanngortinneqarsimanngitsut.

Nalimmassaanermut aaqqissuussaq malillugu aningaasat naatsorsorneqaraangata makku isiginiarneqartarput:

Inummut akileraarutit 90/115 procentinut killiliussat iluini nalimmassarneqassapput.

Ingerlatseqatigiiffiit akileraarutaannit aamma iluanaarutinut akileraarutinit iluanaarutit tamakkiisumik nalimmassarneqassapput.

Ingerlatseqatigiiffiit iluanaarutillu akileraarutaat kiisalu kommuninut ataatsimoortumik akileraarut innuttaasut amerlassusaat pilersuisullu naapertorlugit agguaanneqassapput.

Akileraarutinik siunissami nalimmassaanissamut apeqqutaassapput aalajangiisuusumik nalimmassaasarsimanerit. 2019-imi ukiut akileraaruteqarfiusut 2016 aamma 2017 91,3 millioner koruunit nalingannut nalimmassaaffigineqarsimapput. Nalimmaassaasimaneq taanna 2020-mi 53,2 millioner koruuninut appartinneqassaaq.

Kommunit ilisimatinneqarsimasut

Aningaasaqarnermut Naalakkersuisoqarfiup ilisimatitsissutigaa, ukiup 2019-ip sinnerani appasinnerusumik nalimmassaagallartoqarnissaa pillugu kommunit ilisimatinneqarsimasut. Ukiup 2019-ip sinneranut taamatut nalimmassaagallarsimaneq aappaau akileraarutit nalimmassarneqarnissaannut sunniuteqassaaq.

Akileraartarnermut Aqutsisoqarfiup 2018-imi immaqalu 2019-imi akileraarutitigut isertitassatut naatsorsuutigisat uniorujussuarsimappagit, ukiunut akileraarfiusunut 2018-imut 2019-imullu tunngassuteqartut 2021-mi nalimmassarneqarneranni, aningaasat pissarsiassat aamma taamatulli annertussuseqassapput – ukiumik ataatsimik kingusinaartumik.