Kommunip utoqqaat illuani nalunaaqqaarani sulinngitsoortoqartarnera iliuuseqarfiginianngikkaa

Kommune Kujalleq isumaqarpoq, Luuvikasimmi perusuersartarfiliarniartut ikiorserneqartannginnerannut nalunaaqqaarani sulinngitsoortoqartarnera pissutaasoq. Sulisussanilli nutaanik pissarsinngitsoornissaq ernummatigalugu sulisunik soraarsitserusunngilaq.

Oqaluttuarinikuusatsitut Narsami utoqqaat illuani, Luuvikasimmi najugallit perusuersartarfiliarnissaannut ikiuinissamut piffissaqartoqanngilaq. Inatsisartut ombudsmandiata nakkutilliinermini paasisimavaa, najugaqartut ikiorneqarneq ajornertik pissutigalugu siniffimmut natermulluunnii quisoortartut. Ilaannikkullu natermik saliinissamulluunniit piffissaqartoqarneq ajortoq.

Kommune Kujalleq isumaqarpoq, ikiuisoqartannginneranut ajornartorsiutaasoq nalunaaqqaarani sulinngitsoortoqartarnera. Nalunaarusiaagallartumut oqaaseqaatini, kommunip ombudsmandimut nassiussimasaani tamanna takuneqarsinnaavoq.

Luuvikasimmi nalunaaquttap akunnermusialinnut konto sipaarfigineqarsimanngilaq, akerlianik utoqqaat illuani missingersuutit malikkuminaatsinneqarsimasut, kommuni allappoq. Kommune Kujalliup taamaammat Luuvikasiup missingersuutanik aqutsineq sukateriffigisimavaa.

Powered by Labrador CMS