Skip to main content

Kommunip Narsarsuaq mittarfittut attatiinnarusuppaa

Narsarsuup siunissaa qanorluunniit isikkoqassagaluarpat, Narsarsuaq Kommune Kujallermi innuttaasoqarluni nunaqarfiuinnassaaq. Kommunemi kommunalbestyrelse isumaqatigiittoq taama naqissusiivoq.

Narsarsuarmi periarfissat tamarmik qulaajarneqassapput.

Kommune Kujallermi kommunalbestyrelse isumaqatigiittoq taama naqissusiivoq.

Kommunimi borgmesteri, Kiista P. Isaksen (S), ullumikkut Nuummukarpoq. Taanna kissaatinut allattorsimaffimmik Naalakkersuisunut tunniussassaminik nassataqarpoq, tassanilu aamma allattorsimaffiup imarisaasa oqaluuserinissaanut periarfissaqassaaq.

Kommunalbestyrelsi ippassaq pingasunngornermi septembarip 18-anni ataatsimiippoq, tassani Narsarsuup siunissaa oqaluuserisassanut ilaavoq.

Narsarsuaq heliportinngorsinnaasoq, suleqatigiissitap kommunimit aamma Namminersorlutik Oqartussanit peqataaffigineqartup juunimi ukioq manna inerniliuppaat. Kommunalbestyrelsilli innuttaasunut mittarfimmi suli suliffissaqarnissaa orniginartinneruaat.

- Narsarsuup suli mittarfittut ukioq naallugu ammatinneqarnissaa kissaatitta ilagaat. Tamatuma saniatigut sumiiffimmi inuussutissarsiornikkut periarfissat avataanit siunnersortinit aamma assersuutigalugu Innovation South Greenlandimit pilersinneqaqqammersumit misissorneqarnissaat kissaatitta ilagaat, Kiista P. Isaksen Sermitsiaq.AG-mut taama oqarpoq.

Narsarsuarmi inuussutissarsiornikkut periarfissat siunnersortinit avataaneersunit misissorneqarnerat Namminersorlutik Oqartussanit aningaasaliiffigineqassasoq, kommuni isumaqartoq, taanna naqissusiivoq.

Narsarsuaq attanneqassaaq

- Qanorluunniit pisoqaraluarpat, Narsarsuup attanneqarnissaa kissaatigaarput. Qaqortup mittarfiata pilersinneqarnerata kingorna Narsarsuarmi mittarfik minnerpaamik ukiut tallimat ammatinneqartariaqartoq isumaqarpugut. Atuutsilersitsineq sivisuumik piffissalerneqassaaq, nunaqarfimmi periarfissat tamaasa misissorsinnaaniassagatsigit, Kiista P. Isaksen taama oqarpoq.

Heliportinngortitsinermut apeqqut nuna tamakkerlugu politikkimut tunngammat, Kommune Kujallermi sammineqarsimanngitsoq, taanna oqarpoq.

- Taamaattorli Kujataani angallanneq eqaannerulersinneqarnissaa Naalakkersuisunut oqaatiginiarpara. Angalatitsiviit kujataani atorneqartut akornanni attaveqatigiittoqanngilaq, amerlanerusunik takornariaqalissagutta, angallanneq aamma tamatumunnga paasissutissat ersarinnerusariaqarput, taanna oqarpoq.

Aatsitassat

Nunani allanit soqutiginnittut siornatigut Narsarsuaq pillugu saaffiginnittareersimasut, Kiita P. Isaksenip isertuutinngilaa. Aatsitassarsioqatigiiffiit Narsarsuarmut soqutiginnissimasut, taanna oqaluttuarpoq.

- Aatsitassarsiorfiit Narsarsuarmut soqutiginnittut Naalakkersuisut attaveqarfigisariaqarpaat. Ingerlatseqatigiiffik qanoq perusunnersut paasiniassavarput, tassanngaanniillu aalajangiisoqartariaqarpoq, taanna oqarpoq.

Sammisat tamakku arlallit, kommunilu pillugu, Kommune Kujallermi borgmesterip, Kiista P. Isaksenip, Naalakkersuisut arlallit aamma naalakkersuisoqarfiit peqatigalugit aqagu tallimanngornermi oqaluuserissavaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER