Vilhelmine Lorentzen utoqqaat illuanni qasuersaartarfimmut ataasinngorpat 23. januar uteqqittussanngorpoq. Tassa angerlartitaanerminit ullut tallimat qaangiussimalersullu. Hjemmehjælpeqarluni imminut isumagisinnaasut angerlarteqqinneqartarput.

Ernutaasoq Rena Lorentzen Sermitsiaq.AG-mut taama ilisimatitsivoq.

Vilhelmine Lorentzenip utoqqaat illuannit angerlartitaanera pillugu allaaserisaq saqqummersimatsiartoq ilaqutaasut Kommuneqarfik Sermersuumit sianerfigineqarsimapput.

- Paasitinneqarpugut aanaga utoqqaat illuanni qasuersaartarfiusumut ataasinngorpat uteqqissasoq, inissaqartorlu. Kommunip ilanngullugu neriorsuutigaa ulloq unnuarlu paaqqutarineqarfiusinnaasumut inissinnissaa aamma sulissutigineqassasoq, suliarlu pimoorullugu tiguneqartoq, Rena Lorentzen oqaluttuarpoq.

Taanna oqaluttuarpoq kommunip nassuiaatigisimagaa innuttaasup ulloq unnuarlu paaqqutarineqarnissamut akuersinermut immersugassamik atsiornera amigaatigisimagaat. Ernutaasulli ilisimatitsissutigaa atsiugassaq suna pineqarnersoq ilaqutariiullutik ilisimasaqarfiginagu.

Piumanngitsoq angerlartinneqartoq

92-inik ukiulik Vilhelmine Lorentzenip utoqqaat illuanni qasuersaartarfimmit inissiaanut pingasunngornermi 18. januar angerlartinneqarsimasoq Sermitsiaq.AG-p tallimanngornermi ualikkut saqqummiuppaa.

Vilhelmine Lorentzen isigiarsuttorujussuuvoq, tutsarluttuulluni, kræfteqarluni qaratsamigullu milikartoorsimalluni. Qaratsamigut milikartooreernermi kingorna qaammatit marluk missaanni qasuersaarfiusumi najugaqarsimavoq, nukissaneqqinnerunissaa pillugu.

- Angerlartinneqarpunga, uffa ulloq unnuarlu paaqqutarineqarnissara pisariaqartikkiga. Kisima angerlarsimanissara toqqissisimanarinngilara, Sermitsiaq.AG-mut oqaluttuarpoq.

Kommuneqarfik Sermersuumi utoqqarnut tunngasuni allaffissornermi pisortaq, Arnannguaq Heilmann Christensen Sermitsiaq.AG-mut ilisimatitsivoq innuttaasut qasuersaarfimmiittut tamarmik ataasiakkaarlugit nalilersorneqartartut. Nalilersuinermi innuttaasup pisariaqartitai, ikiuutaasinnaasullu nalilersorneqartarput, ikiuutit eqqortut Kommuneqarfik Sermersuumit tunniunneqarsinnaaniassammata.

Nutaarsiassat

Kommunip paaqqinnittarfiini atuarfiup kingorna ornittakkanilu sulisut pikkorissartut

Nuummi paaqqinnittarfinni kiisalu atuarfiup kingorna ornittakkani sulisut ilinniagaqarsimanngitsut piginnaanngorsaqqinneqarnertik sapaatit akunnerisa qulinganni aallartippaat....

Innuttaasunik suliffeqarfinnillu sullissineq pitsaanerusoq

Qatserisartut Sermersuup innuttaasut suliffeqarfiillu  ajornannginnerusumik upalungaarsimasunut attaveqartarnissaat kissaatigivaa.

Nalinginnaasunik apeqqutissaqaruit imaluunniit...